Trajneri i Kombëtares, Sylvinho, u shfaq i qetë dhe i vendosur gjatë konferencës për shtyp në prag të sfidës vendimtare ndaj Ukrainës, por deklaratat e tij nuk munguan të linin një shije interesante për të gjithë të pranishmit.
“Mbrojmë si 10, sulmojmë si ekip”
Sylvinho e nisi me filozofinë e tij të zakonshme, duke theksuar rëndësinë e unitetit taktik. “Kur mbrojmë, jemi si një bllok me 10 lojtarë. Edhe kur sulmojmë, e bëjmë të gjithë,” tha ai, duke rikthyer kujtimet e golit të Ismajlit në përballjen e kaluar me Ukrainën. Deklarata dukej si një sinjal për të forcuar besimin në ekipin e tij, që tani lufton për vendin e parë.
Dilemat e fundit dhe dyshimi për Asanin
Një nga pikat më pikante ishte trajtimi i gjendjes fizike të lojtarëve, ku Sylvinho ishte tepër i kujdesshëm, veçanërisht për situatën e Asanit dhe Tucit. “Asani do të stërvitet sot pak nga pak, dhe nëse nuk e përfundon stërvitjen, nuk do të luajë nesër. Nuk marrim rreziqe,” u shpreh ai. Në këtë moment, Sylvinho dha një batutë që shkaktoi buzëqeshje në sallë: “Në fushë nuk futet kushdo që thotë ‘trajner, jam gati’. Fusha flet!”
Dy sulmues? Mos prisni ‘dy torra’ përpara!
Pyetja për një formacion me dy sulmues e kapi trajnerin me humor, por ai ishte i qartë: “Nuk më pëlqen të luaj me dy ‘torra’ përpara. Duhet balancë në skuadër.” Kjo u duk si një mesazh për ata që kërkojnë formacione ultra-ofensive, duke shtuar se Daku dhe Uzuni mund të jenë kombinim i mundshëm.
“Do të vrapojmë si derra!”
Një frazë që nuk kaloi pa vëmendje ishte kur Sylvinho përshkroi intensitetin e skuadrës së tij në fushë. “Në fushë do të vrapojmë si derra, dhe pastaj, kur të mbarojë ndeshja, do të shohim rezultatin,” tha ai, duke krijuar një moment që u prit me të qeshura nga gazetarët, por që reflektoi seriozitetin e përgatitjes së skuadrës.
Objektivi? Vendi i parë, por pa frikë!
Sylvinho nuk e fshehu ambicien për të kapur vendin e parë në grup, duke i dhënë një motivim të qartë skuadrës dhe tifozëve. Ai përsëriti se ky grup është ndër më të balancuarit dhe çdo rezultat është i mundur. Por për trajnerin, frika nuk është një opsion: “Në fushë nuk shkohet me frikë, as ne dhe as ata. Do ta provojmë dhe ta shohim pas ndeshjes.”
Finalja që do të vendos gjithçka
Tekniku brazilian e mbylli konferencën me një mesazh të qartë për lojtarët dhe tifozët: “Kjo ndeshje është finale. Duhet zemër dhe shpirt për të dalë triumfues. Po luajmë në shtëpi dhe kemi mbështetjen e publikut tonë.”
Kështu, Sylvinho u shfaq i përqendruar dhe i sigurt, duke përgatitur një ekip që kërkon të mbyllë këtë fushatë të suksesshme me një moment historik: vendin e parë në grup.
