Në Kosovë janë numëruar deri më tani 4% e votave të diasporës duke ndryshuar dhe projektimin aktual të ndarjes së ulëseve në Kuvend. Referuar të dhënave paraprake të Komisionit Qendror Zgjedhor, Lëvizja Vetëvendosje ka marrë ulësen e 49 në Parlament, ndërsa Lidhja Demokratike e Kosovës humbet 1 vend duke shkuar në 19 deputetë. Partia Demokratike e Kosovës vijon të ketë 24 mandate si dhe Aleanca për Ardhmërinë e Kosovës vijon të ruajë 8 ulëset.
Votat ende të panumëruara plotësisht të diasporës për zgjedhjet e parakohshme parlamentare të 7 qershorit, pritet të kenë peshë më të madhe. Sipas Komisionit Qendror të Zgjedhjeve (KQZ), 104 mijë e 480 votues ishin regjistruar për të votuar përmes postës, ndërsa në 30 përfaqësitë diplomatike të Kosovës në mbarë botën kanë votuar 22 mijë e 414 persona.
