Partizani nuk shkon më shumë se 1-1 në transfertën me Laçin, duke u ndalur në barazimin e dytë radhazi. Zeka zhbllokoi ndeshjen, duke i dhënë të kuqve avantazhin, por përgjigja erdhi menjëherë nga Ballhysa, që largoi në këtë mënyrë skuadrën e Veselenovic nga kreu i renditjes.
Laçi është një fushë e vështirë në të cilën Partizani shpeshherë e ka parë veten në vështirësi. Edhe këtë herë kurbinasit nuk i tradhëtojnë pritshmëritë, duke tentuar disa herë portën e Qirkos. Një përballje mjaft e luftuar mes dy skuadrave, sepse edhe Partizani kërkoi të zgjidhte ndeshjen, edhe pse pa bërë aventura.
Të kuqtë u munduan të ishin të kujdesshëm, mbi të gjitha për të mos pësuar, duke qenë se Laçi po insistonte me Melon e Tresën. Sidoqoftë, Zeka mori përsipër ofensivën e Veselinovic dhe provoi në dy raste të rrezikonte portën e Dajsinanit. Tentativa e parë u ndal nga portieri, ndërsa e dyta u stampua në traversë. E ishte pikërisht Zeka që në provën e tretë gjeti golin. Në minutën e 80′ Bintsouka depërtoi nga e djathta dhe shërbeu në qendër ku Zeka nuk gaboi.
Lexo më tej: Video/ Vllaznisë i anulohet goli në të 87’, Balaj i jep fitoren në të 95’: shembet Teuta, qan rastin e Nasr
U krijua ideja e një fitore të arritur, duke qenë se pak minuta e ndanin Partizanin nga 3 pikët, por Laçi reagoi shpejt. Festa e “demave” zgjati vetëm pak, pasi në minutën e 86′ Leo Ballhysa ktheu ekuilibrin, duke bërë që sfida të mbyllej 1-1. Partizani shkon kështu në kuotën e 8 pikëve dhe mban vendin e 3-të në tabelën e klasifikimit. Mbetet i fundit Laçi, me 3 pikë dhe ende pa fitore.
