Barazimi me Kroacinë ishte dramatik, me kuqezinjtë që kaluan nga fitorja në humbje, për të rrëmbyer në fund një barazim drithërues, kundër të tretëve në Botërorin e Katarit. Protagonist absolut, në të mirë e të keqe, ishte Klaus Gjasula, që shënoi një autogol që përmbysi rezultatin në favor të kroatëve, përpara se të barazonte në kohën shtesë, duke çmendur nga gëzimi tifozët, mes të cilëve spikati edhe vëllai i tij Jurgen Gjasula, ish-futbollisti i kombëtares shqiptare.
Mesfushori i Darmstad u fut në fushë në minutën e 72′ kundër Kroacisë dhe pas katër minutash në fushë shkaktoi autogolin fatkeq. Një episod që mund të linte trauma në mendjen e Klaus, që nuk pati impaktin e duhur me ndeshjen kur hyri, por e mbylli atë si duhej. E kur humbja dukej e sigurtë, Gjasula shpengoi veten duke shënuar golin e barazimit për Shqipërinë. Një gol, që mbi të gjitha emocionoi në tribunën e stadiumit të Hamburgut të vëllain e tij Jurgen Gjasula.
Përmes një postimi në rrjetet sociale ai ka ndarë dy video të momentit të realizimit të golit për Kombëtaren teksa shpërthen në lot. “Nuk kam fjalë, jam shumë krenar për ty vëllai im”, shkruan Jurgen.
