Genoa arriti të mposhtë Sassuolon në ndeshjen e mesditës së kësaj të diele në Serie A falë golit të Ekuban, që i lejoi skuadrës së De Rossi ta mbyllte ndeshjen me rezultatin 2-1. Një përballje e karakterizuar edhe nga përjashtimet e dy lojtarëve: Domenico Berardi dhe Mikael Ellertsson. Në rikthimin në fushë pas pushimit, Genoa dhe Sassuolo u paraqitën në fushë me nga 10 lojtarë. Kartoni i kuq për të dy u nxor në tunelin e dhomave të zhveshjes për shkak të një sherri mes tyre.
Video e DAZN dhe sidomos ajo e disa tifozëve të pranishëm në shkallët e Ferraris, treguan çfarë po ndodhte në atë moment. Pamjet tregojnë një Berardi të tërbuar që mbahet me vështirësi nga shokët e skuadrës. Kapiteni i Sassuolo-s ishte rikthyer në fushë pasi kishte pasur një debat me Sabelli. Në tunel më pas pati një përplasje verbale dhe fatmirësisht jo plotësisht fizike fillimisht me Vitinha dhe më pas me Ellertsson që ndërhyri në një moment të dytë. E gjitha nën sytë e arbitrit që përjashtoi të dy.
Momenti kur ndërhyn edhe Ellertsson
Një përballje shumë e tensionuar mes dy lojtarëve. Në video mund të shihen qartë reagimet e lojtarëve që u përpoqën me çdo kusht të ndalonin nga njëra anë Berardi-n dhe nga ana tjetër fillimisht Vitinha-n dhe më pas Ellertsson. Gjyqtari Rapuano në fund u detyrua të nxirrte kartonin e kuq për të dy lojtarët, duke i lënë skuadrat, në rikthim në fushë, sërish në barazi numerike, por 10 kundër 10. E gjithë kjo në fund të pjesës së parë dhe me skuadrat në pushim në rezultatin 1-0 në favor të “Grifone”, falë golit të Malinovskyi.
Çfarë ndodhi në tunelin e Ferraris mes Berardi dhe Ellertsson
Duket se Berardi fillimisht e kishte me Sabelli për diçka që kishte ndodhur në fushë. Mesa duket biseda shkoi aq larg sa Vitinha u detyrua të ndërhynte për t’i ndarë. Në një moment shihet edhe ndërhyrja e Ellertsson për të shmangur përplasjen fizike mes vetë Berardi-t dhe sulmuesit të Genoa-s. Qartësisht Rapuano duhej të ndëshkonte dikë, nuk mund të bënte sikur nuk shihte. Dhe kështu, përveç Berardi-t, nxori kartonin e kuq edhe për lojtarin e fundit që ndërhyri në sherr, pra Ellertsson.
