Ish-presidenti i Shteteve të Bashkuara, Donald Trump, ka kritikuar kryeministrin e Izraelit, Benjamin Netanyahu, për mungesë përgatitjeje ndaj sulmit të fundjavës nga grupi militant palestinez, Hamas, si pasojë e të cilit u vranë rreth 1.200 izraelit.
Duke folur për Fox News të mërkurën, Trump, i cili i prin garës për t’u nominuar kandidat për president nga radhët e republikanëve për zgjedhjet e 2024-ës, tha se Netanyahu “është lënduar shumë keq” nga ky sulm.
“Ai nuk ishte i përgatitur. Edhe Izraeli nuk ishte përgatitur. Me Trumpin, atyre nuk do t’iu nevojitej fare të përgatiteshin”, tha Trump.
Trump i bëri këto komente në një kohë kur Izraeli ende po i mbledh trupat e të vdekurve dhe ende nuk e ka marrë veten nga sulmi befasues e njëri prej sulmeve më shkatërruese në historinë e vet.
Të hënën, Izraeli nisi bombardimet hakmarrëse në Rripin e Gazës, duke vrarë së paku 1.200 palestinezë. Një nga kundërshtarët e Trumpit në garën e republikanëve, guvernatori i Floridës Ron DeSantis, e kritikoi ish-presidentin për këto komente.
“Është absurde që dikush, aq më pak dikush që garon për president, do ta zgjidhte këtë kohë për ta sulmuar aleatin dhe mikun tonë, Izraelin”, shkroi DeSantis në rrjetet sociale.
Sipas Radio Evropa e Lirë, Trumpi dhe Netanyahu kishin marrëdhënie shumë të mira gjatë kohës së Trumpit si president, edhe pse ka pasur përçarje në raportet mes tyre që ishin të pathyeshme më parë.
Duke folur para përkrahësve në Florida të mërkurën mbrëma, Trump komentoi përsëri për përgatitjet e sigurisë nga Izraelit, duke nënvizuar “disa gjëra që shkuan keq në fundjavë. Ata duhet ta zgjidhin këtë, sepse po luftojnë ndoshta me një forcë shumë të madhe, ata mbase po luftojnë me Iranin” , shtoi Trump.
