Kryeministri Edi Rama ka sulmuar gjykatësin e radhës të cilin me përçmim e quan “gjykatësi Ligoraq” për një ndërtim pa leje mes pallateve në Tiranë, duke shpjeguar se nuk do të heshtë kur bëhet fjalë për interesin publik, por duke bërë dallimin për rastet kur vendimet kanë lidhje me luftën kundër korrupsionit.
Rama publikoi foton e një lokali mes pallateve, që sipas tij “në rast zjarri kthehet në barrikadë vrastare, e pakapërcyeshme edhe për banorët edhe për zjarrfikësit” ndërsa sqaroi se vendimi për mosprishjen e këtij ndërtimi do të ankimohet nga një dosje e Ministrisë së Drejtësisë.
Në mesazhin e tij, Rama u përgjigjet akuzave për “presion mbi drejtësinë” duke thënë se deklaratat kundër gjykatësve për ndërtimet pa leje nuk duhen ngatërruar me “qëndrimin tonë të palëkundur në mbështetje të drejtësisë dhe institucioneve të saj, në luftën kundër korrupsionit, krimit të organizuar dhe lirive e të drejtave të njerëzve”.
Mesazhi i plotë i kryeministrit në rrjetet sociale
Gjykatësi Ligoraq vendosi në pak minuta pa praninë e palëve, që të mos hapet kalimi i mbyllur nga kjo ngrehinë pa leje me kupolë xhami mes dy pallateve, nën të cilën shtrihet një dyqan ku bëhet tregti në kurriz të komunitetit.
Gjykatësi Ligoraq nuk e ka parë të udhës që të mbajë anën e komunitetit të zënë në kurth nga ky ndërtim pa leje dhe me siguri as nuk e ka menduar që mos o Zot, në rast zjarri ky dyqan kthehet në barrikadë vrastare, e pakapërcyeshme edhe për banorët edhe për zjarrfikësit
Gjykatësi Ligoraq i bashkohet kësisoj prokurores Gjeli, gjykatësve Balliu e Demiri, në dosjen që Ministria e Drejtësisë do t’i përcjellë organeve të kontrollit e të vetëqeverisjes së gjyqësorit, ndërkohë që ne do të kërkojmë që ankimimeve në këto organe t’u bashkohen edhe qytetarët e dëmtuar nga këto masa sigurie absurde, në dëm të komunitetit, mjedisit dhe rendit ligjor
Post Scriptum. Atyre që komentojnë apo bëjnë deklarata publike për gjasme presion nga ana ime mbi gjyqësorin, u them se për të mbrojtur interesin publik, të drejtën e komunitetit dhe të drejtat e liritë e njerëzve nga shpërdoruesit e detyrës në radhët e gjyqësorit, ne as do të heshtim më, as do të ndalemi së adresuari rastet e shpërdorimit në organet përkatëse të cilat Kushtetuta e ligji i ngarkojnë edhe me mbrojtjen e interesave të popullit e të shtetit, nga prokurorë e gjykatës të paaftë, të papërgjegjshëm, të dyja bashkë apo edhe më keq, pa atdhe fare.
Por askush të mos ngatërrojë qëndrimin ndaj këtyre individëve, me qëndrimin tonë të palëkundur në mbështetje të drejtësisë dhe institucioneve të saj, në luftën kundër korrupsionit, krimit të organizuar dhe lirive e të drejtave të njerëzve.
