Qytetarët rikthehen sot në protestë përpara Kuvendit, në ditën kur zhvillohet seanca e fundit plenare e këtij sesioni parlamentar. Një ditë më parë, protestuesit mbyllën tubimin dhe lanë një mesazh simbolik në Bulevard, ku shkruan datën “27 korrik” dhe vizatuan një vezë, duke paralajmëruar protestën e sotme para Parlamentit.
Sipas organizatorëve, në 08:30 protestuesit marshojnë drejt Kuvendit, ku deputetët zhvillojnë seancën e fundit plenare para pushimeve verore. Marshimi shoqërohet me thirrjet “Parlamenti i krimit”, “Rama, jep dorëheqjen”, “Pa rini nuk ka Shqipëri”, “Shqipëria kërkon revolucion” dhe “Ju erdhi fundi”.
Organizatorët kanë bërë të qartë se protesta nuk përfundon me mbylljen e sesionit parlamentar. Ata deklarojnë se mobilizimi do të vazhdojë deri në plotësimin e kërkesave të tyre, mes tyre dorëheqja e kryeministrit Edi Rama dhe krijimi i një qeverie teknike.
