Një sulm i madh rus me raketa dhe dronë goditi Kievin të enjten në mëngjes, duke shkaktuar të paktën tetë viktima dhe dhjetëra të plagosur, njoftoi presidenti ukrainas Volodymyr Zelensky.
“Këto raketa dhe dronë rusë janë një përgjigje e qartë për të gjithë ata që prej javësh kërkojnë armëpushim dhe diplomaci. Rusia zgjedh raketat balistike në vend të tryezës së bisedimeve”, tha Zelensky në një reagim në X, duke kërkuar sanksione të reja ndaj Moskës dhe një reagim nga Kina.
Sipas autoriteteve lokale, mes viktimave ishte edhe një vajzë 14-vjeçare dhe një fëmijë tjetër. Mbi 20 zona të kryeqytetit u goditën, përfshirë një pallat pesëkatësh në lagjen Darnytskyi, ku dëmet ishin të mëdha. Shpërthime të fuqishme u dëgjuan në mbarë qytetin, ndërsa qindra banorë u strehuan në stacionet e metrosë.
