Carlo Ancelotti dhe Real Madrid eliminuan Manchester City me penallti dhe fitojnë kalimin në gjysmëfinalen e Champions League, ku do të përballen me Bayern Munich. Një ndeshje që shkoi përtej kohës së rregullt dhe u luajt për më shumë se 210 minuta, në të cilat në fund triumfuan spanjollët. Tekniku i Blancos, në konferencën për shtyp, u shpreh krenar për ekipin e tij: “Jam shumë i lumtur, e dinim se duhej të vuanim dhe vuajtëm. Një ndeshje shumë e vështirë, por për të fituar dhe për t’u kualifikuar duhet të kishim këtë sjellje. E nisëm mirë, pastaj ata luajtën dhe na vunë në vështirësi. U treguam të qetë e të durueshëm, në fund fituam”.
“Jam shumë krenar për fazën e mbrojtjes sepse nuk jemi mësuar ta bëjmë kështu. Zumë hapësirat dhe ishim kompaktë. Nuk është e lehtë të kesh më shumë kontroll në ndeshjen kundër City, ata janë kampionët”, tha Ancelotti. Më pas ai shtoi: “Goli na bëri të mbylleshim prapa, nuk kishim nevojë të luanim në mënyrë ofensive. Ishte një gol i bukur, më pas luajtëm në kundërsulm dhe mund t’i kishim shfrytëzuar më mirë”.
Megjithatë, sa i përket trofeut të 15 të mundshëm të Champions League për Los Blancos, ai iu shmang çdo pyetjeje: “Së pari le të mendojmë për gjysmëfinalen. Në tre vitet e fundit kemi luajtur me City dhe ata janë më të mirët në Evropë. Mundja e tyre ishte një mundësi për të fituar një tjetër Champions League”, e mbylli Ancelotti.
https://twitter.com/realmadriden/status/1780751324457402750?ref_src=twsrc%5Etfw%7Ctwcamp%5Etweetembed%7Ctwterm%5E1780751324457402750%7Ctwgr%5Ec17716ca0ae59e7c62bba753e76423b8749e7435%7Ctwcon%5Es1_&ref_url=https%3A%2F%2Flapsi.al%2F2024%2F04%2F18%2Freal-madrid-ancelotti-krenare-te-mundesh-manchester-city-na-jep-mundesine-te-fitojme-champions%2F
