Randal Kolo Muani e ka mbyllur përvojën e tij te Juventus pas daljes nga Botërori për Klube kundër Real Madrid, që më pas vulosi nisjen e pushimeve për skuadrën e Tudor. Sulmuesi francez, ndërkohë, duhej të respektonte kontratën e tij që e detyroi të kthehej te PSG, që megjithatë ka plane të tjera. Kolo Muani, në fakt, është një nga pesë lojtarët e larguar nga Luis Enrique, i cili ka vendosur të heqë dorë edhe nga ish-sulmuesi i Eintracht duke e dërguar te skuadra e të rinjve të PSG.
Një vendim drastik nga trajneri spanjoll Luis Enrique i cili kështu e ka vendosur zyrtarisht mes lojtarëve që do të largohen Kolo Muani, i cili ka gjithë interesin të kthehet te Juventus ku është ndjerë shumë mirë. Në pritje për të kuptuar nëse PSG dhe bardhezinjtë do të arrijnë një marrëveshje për transferimin e francezit te Zonja e Vjetër, Kolo Muani do të stërvitet me sektorin e të rinjve të parisienëve bashkë me pesë lojtarë të tjerë të skuadrës së parë: Milan Škriniar, Marco Asensio, Carlos Soler dhe Nordi Mukiele.
Siç raporton Le Parisien, për ta sezoni do të nisë me sektorin e të rinjve. Mbetet për t’u kuptuar edhe e ardhmja e vetë Škriniar, i cili pas huazimit te Fenerbahçe është kthyer në Francë për të kuptuar se cili do të jetë destinacioni i tij i ardhshëm. Por objektivi i shumë skuadrave është pikërisht Kolo Muani. Francezi 26-vjeçar, i cili e kaloi gjysmën e dytë të sezonit 2024/25 në huazim te Juventus, në sezonin 2024/25 regjistroi 36 paraqitje zyrtare, duke shënuar 12 gola dhe dhënë katër asiste.
Plani i Juventus për të marrë Kolo Muani nga PSG
Juventus për momentin, pasi ka marrë David, Conceicao dhe Joao Mario, ka bërë disa oferta huazimi me të drejtë blerjeje ose me detyrim blerjeje ndaj PSG-së për Kolo Muani gjatë javëve të fundit. Megjithatë, PSG preferon një shitje përfundimtare për të siguruar shumën e transferimit këtë vit. Për lojtarin ka interes nga disa skuadra të Premier League, por dëshira e lojtarit për t’u kthyer te Juventus mund të jetë vendimtare. Ndjesia është që Comolli dëshiron të presë disa shitje të tjera, sidomos atë të Vlahovic, përpara se të bëjë sulmin vendimtar për francezin.
