“Parisi pa gjeni”. Kështu, Equipe përcakton PSG-në, e eliminuar nga Champions League në 1/8 për të dytin vit radhazi dhe për të pestën herë në shtatë vitet e fundit. Yjet nuk mjaftojnë. Në të vërtetë, yjet u hijëzuan. Neymar është jashtë i dëmtuar, por as Messi dhe as Mbappé nuk po e bëjnë të ndihet praninë e tyre në fushë. E tani e ardhmja e të gjithëve është në pikëpyetje. Ajo e trajnerit Galtier, por edhe e asit argjentinas, kontrata e të cilit skadon në qershor. Bashkë me ta edhe e sulmuesit francez, i cili insinuon dyshime pas ndeshjes: “E vetmja gjë që ka rëndësi për mua këtë sezon është fitorja e Ligue 1 dhe më pas do të shoh”.

Makthi i Ligës së Kampionëve për PSG. Nuk ka përmbysje në Gjermani pas humbjes në shtëpi. Lamtumira në kompeticion ka ardhur në 1/8, siç ndodhi vitin e kaluar, kur ishte Real Madrid ai që dërgoi francezët në shtëpi. Është falimentim i pastër. Pankina e Galtier është më e lëkundur se kurrë, aq sa presidenti Nasser Al-Khelaifi – shkruajnë në Francë – ka caktuar një takim me të gjithë drejtuesit për të analizuar situatën. Aty ndoshta mund të vendoset edhe për shkarkimin e menjëhershëm të trajnerit.

TRAJNERI I RI E DILEMAT E YJEVE…
E në pole position për ta zëvendësuar është Thomas Tuchel, i shkarkuar në prag të Krishtlindjeve 2020. Me gjermanin PSG fitoi dy Ligue 1 dhe luajti në një finale të Ligës së Kampionëve të humbur kundër Bayern Munich. Në dyshim edhe qendrimi i Messi. Takimi i fundit mes babait-menaxher dhe drejtuesve parisien nuk solli asnjë përparim në negociata dhe rinovimi mbetet pezull. Për L’Equipe, ajo në Bavari mund të ishte e fundit në Champions League për argjentinasin me fanellën e PSG. Ndërsa Mbappé reflekton: “Do të shohim”.