Një video befasuese në rrjetet sociale duket se tregon një tifoz të Liverpool, që provokon spanjollin Pep Guardiola. Trajneri i Manchester City reagon me kërcënim dhe kërkon konfrontimin fizik me tifozin, gjë që u shmang nga ndërhyrja e kujdesshme e shoqëruesve të spanjollit.
Guardiola pësoi humbjen e gjashtë në shtatë ndeshje jashtë fushe ndaj Liverpool fundjavën e kaluar, duke mbetur 11 pikë pas ekipit të drejtuar nga Arne Slot. Kështu, mbrojtja e titullit të Manchester City është në një gjendje kritike. Gjatë ndeshjes, tekniku u përball me tallje të pamëshirshme nga tifozët e Anfield, të cilëve iu përgjigj duke ngritur gjashtë gishta për të treguar numrin e titujve të Premier League që ka fituar.
Tani, një video e shpërndarë nga llogaria e tifozëve të Liverpool Spion Kop në X, duket se tregon spanjollin duke reaguar ndaj një tifozi në rrugë. Videoja, që duket e pabesueshme, është filmuar jashtë Embankment Kitchen në Manchester, pasi Guardiola dhe ekipi i tij ishin kthyer nga Merseyside. Në video, Guardiola shihet duke ecur në rrugë, kur një person prapa kamerës i drejtohet me një theks liverpulas: “Mirë shoku, vetëm sepse humbe”.
Guardiola më pas kthehet dhe reagon furishëm, duke u detyruar të mbahet nga tre burrat që po e shoqëronin, ndërsa ai thërret diçka të pakuptueshme teksa largohet nga rruga.
— Spion Kop (@TheKopHQ) December 6, 2024
