Mcn Tv ka siguruar dosjen hetimore ndaj bashkëshortes së kryebashkiakut të Tiranës, Ajola Xoxa, ku ndër të tjera është edhe dëshmia e ish-financieres Adela Konadakçiu që u bë bashkëpunëtore e drejtësisë.
Bashkëpunëtorja e drejtësisë tregon se për afro 1 vit e gjysmë janë zhvilluar kurse arti pranë “Harabel”-it, në amientet e Sky Tower. Ajo tregon se Ajola “më ka thënë të presë fatura sepse prindërit e fëmijëve i kishin dhënë parapagim për disa muaj, për kurse arti”.
Financierja tregon se faturat ia ka dorëzuar Ajolës dhe paratë janë derdhur në llogarinë e “Harabel”-it. “Mban mend se eurot zakonisht ishin prerje 500 euro”, thuhet në dosje.
“Më pas këtë gjë e kam bërë edhe te Arts Lab, Ava Studio, pra mi jepte lekët Ajola. Unë kam prerë fatura sipas përshkrimit që më thoshte Ajola dhe pasi deklaroja faturat i depozitoja në llogaritë e këtyre shoqërive. Shumica e parave kanë qenë prerje 500 euro”, tregon ajo.
Në dosjen e SPAK thuhet se nga depozitimet në banka provohet se deklarimet e lartpërmendura mbështeten në rrethanat e faktit.
Në total në dy subjektet e lidhura me Ajola Xoxën janë depozituar 102,203 euro cash. Në total kanë qenë 50 kartmonedha me prerje 500 euroshe, dhe 1,406 me prerje 50 euro. Qarkullimi i shumave të holla në cash, në zotërim të Ajola Xoxës konfirmohet edhe nga kontrolli në zyrat e Partners Law. /MCNTV
