Presidenti kroat, Zoran Milanoviq, ka komentuar rastin e dy personave të arrestuar për spiunazh në Kroaci: një pilot të Forcave Ajrore Kroate, i cili kishte shërbyer më parë edhe në KFOR, dhe të dashurën e tij serbe nga Mitrovica, të cilët dyshohet se kanë vepruar në favor të Serbisë.
Milanoviq bëri të qartë se mbështet të gjitha institucionet e vendit në lidhje me hetimin e nisur.
“Lidhur me fillimin e një hetimi kundër oficerit të Forcave të Armatosura Kroate J.I. (54) nën dyshimin për kryerjen e veprës penale të spiunazhit sipas Nenit 348, paragrafi 1 i Kodit Penal, Presidenti i Republikës Zoran Milanović shpreh mbështetje për të gjitha institucionet e Republikës së Kroacisë, kryesisht VSOA-n, të cilat kanë vërtetuar nëpërmjet veprimeve të tyre kryerjen e mundshme të veprave penale në dëm të Republikës së Kroacisë dhe kanë marrë masa të përshtatshme brenda juridiksionit të tyre me qëllim zbulimin e autorëve të mundshëm dhe parandalimin e veprave të mëtejshme penale”.
Në një komunikatë zyrtare nga Zyra e Presidentit theksohet se Milanoviq është informuar në kohën e duhur për veprimet e institucioneve kompetente dhe pret një hetim të shpejtë dhe efektiv që do të sqarojë të gjitha faktet.
