Bota, katolike dhe jo vetëm, vajton vdekjen e Papa Françeskut. Pas disa javësh të kaluara në Poliklinikën Gemelli të Romës, për të kuruar një bronkit dhe më pas një pneumoni bilaterale, Ati i Shenjtë ishte kthyer në Santa Marta për rikuperim dhe ditën e Pashkës kishte marrë pjesë në meshë nga Lozha në Sheshin e Shën Pjetrit për bekimin ‘Urbi et orbi’. Lajmi për ndarjen nga jeta të Atit të Shenjtë u njoftua nga salla e shtypit e Vatikanit: “Në orën 7:35 është kthyer në Shtëpinë e Atit”.
Jorge Mario Bergoglio ishte një adhurues i madh i sportit dhe sidomos i futbollit: lidhja e tij me San Lorenzo de Almagro shkon përtej tifozerisë së thjeshtë dhe u formësua gjatë fëmijërisë brenda klubit. Pasionin për Ciclón-in e trashëgoi nga familja e tij: babai i tij, i pasionuar pas basketbollit, luante në skuadrën kuqeblu dhe të dielave pasdite i kalonte në Gasómetro në Avenida La Plata, stadiumi i San Lorenzos.
Papa Françesku dhe pasioni për San Lorenzon
San Lorenzo u themelua në vitin 1908 nga të rinjtë e lagjes Almagro nën mbrojtjen e priftit salesian Lorenzo Massa: i shqetësuar për sigurinë e fëmijëve, Massa ofroi oborrin e Oratorit të Shën Antonit për të luajtur, në këmbim të pjesëmarrjes në meshën e së dielës. Në shenjë mirënjohjeje, të rinjtë i dhanë klubit emrin San Lorenzo, në nder të shenjtorit dhe priftit që i kishte mbështetur.
Si kryeipeshkv i Buenos Airesit, Bergoglio ruante një marrëdhënie të ngushtë me San Lorenzon. Çdo 1 prill, në përvjetorin e themelimit të klubit, ai kremtonte meshë në kapelën e klubit dhe në Fshatin Olimpik, prej nga ku mund të shihte Gasometrin e Ri. Pasioni i tij për skuadrën ishte i njohur dhe shfaqej në gjeste të thjeshta, si emocionet kur kremtonte meshë me stadiumin në sfond.
Kur u zgjodh Papë, në vitin 2013, u fol për ‘Efektin Françesku’ sepse klubi pa një rritje të numrit të tifozëve dhe anëtarëve në të gjithë botën, përfshirë figura si Novak Djokovic. Gjatë pontifikatit të tij, Françesku ka treguar në disa raste dashurinë e tij për Ciclón-in dhe në vitin 2014 një delegacion i San Lorenzos, pasi fitoi Copa Libertadores, shkoi në Vatikan për t’i dhuruar një kopje të trofeut. Papa nuk e fshehu emocionin dhe deklaroi pa shumë fjalë: “Të jesh me origjinë nga San Lorenzo bën pjesë në identitetin tim kulturor”.
Në vitin 2016 u organizua në Romë një ndeshje, pas takimit me Papën, mes skuadrës verdhekuqe dhe argjentinasve në Olimpico dhe të ardhurat iu dedikuan popullatave të prekura nga tërmeti në Italinë qendrore.
Dashuria e Papa Françeskut për San Lorenzon: “Ai gol i Pontonit!”
Pas zgjedhjes së tij në vitin 2013 Papa Françesku shkroi një letër për të falënderuar San Lorenzon për mbështetjen dhe afërsinë: “Më bëri shumë të lumtur letra që, me rastin e zgjedhjes sime në Katedrën e Pjetrit, keni dashur të më dërgoni në emër të Club Atlético San Lorenzo de Almagro, ashtu si edhe fanella e skuadrës që aq miqësisht ma dhuruat”.
Fjalët e Atit të Shenjtë nuk ishin vetëm formale dhe kujtonin disa momente domethënëse të rinisë së tij të lidhura me ngjyrat e Ciclón-it: “Në moshën 10-vjeçare ndoqa fushatën lavdishme të ’46-ës. Ai goli i Pontonit!”. Bëhet fjalë për golin që i dha San Lorenzos titullin e tretë argjentinas, të shënuar nga sulmuesi, i quajtur Chancha, i cili ishte pjesë e Terceto de Oro me Rinaldo Martino dhe Armando Farro.
