Janë bërë virale pamjet kur zëdhënësja e ministrisë së jashtme të Rusisë, Maria Zakharova u urdhërua me telefon para kamerave që të mos bëjë komente për sulmin rus me raketa balistike ndërkontinentale ndaj Ukrainës mëngjesin e së enjtes.
Ajo mori një telefonatë në mes të konferencës për shtyp sot dhe “u këshillua” me një ton të ashpër nga dikush në krahun tjetër që të mos bënte komente. Gjithçka u dëgjua pasi mikrofoni ishte i hapur.
“Përshëndetje. Jam duke bërë një konferencë shtypi”, – i tha Zakharova personit që e mori në telefon.
“Masha”, – u dëgjua një zë i panjohur mashkulli në telefon: “Për sulmin e raketave balistike “Yuzhmash” për të cilën perëndimorët kanë filluar të flasin, ne nuk e komentojmë fare”, – tha zëri në anën tjetër të telefonit. Zëdhënësja e ministrisë së jashtme të Rusisë konfirmoi dhe mbylli telefonin.
Zakharova foli mbi propozimet për një nismë paqeje “realiste” për konfliktin në Ukrainë pasi SHBA i dha Ukrainës lejen për të përdorur raketat e saj me rreze të gjatë veprimi ATACMS kundër objektivave thellë brenda Rusisë.
“Ne jemi të hapur për negociata, jemi të gatshëm të shqyrtojmë çdo iniciativë realiste, jo të politizuar – sigurisht” – tha Zakharova, duke shtuar se Rusia do të konsideronte vetëm një zgjidhje “e cila bazohej në marrjen parasysh të interesave tona”.
“Dëshiroj të theksoj edhe një herë: fjala kyçe është marrja parasysh e interesave të vendit tonë, situata aktuale në terren dhe garancitë e respektimit të marrëveshjeve përkatëse” – tha ajo.
