Ditë me ushqim të shijshëm, kajak në det, eksplorim varresh antike dhe, sigurisht, plazhe. Pavarësisht çfarë u pëlqen fëmijëve tuaj, rrjeti i larmishëm i ishujve të Mesdheut ofron përvoja për çdo familje.
Rreth 3 mijë ishuj janë shpërndarë në Mesdhe, si gurë kalimi drejt një bote ku koha ecën më ngadalë dhe jeta ka ritmin e pushimeve të qeta familjare.
Përtej plazheve mahnitëse, secili ishull ka karakterin e vet, duke u dhënë fëmijëve mundësinë të zbulojnë gjuhë, ushqim, histori dhe kulturë.
Majorka
Për aventura në natyrë dhe jetë qyteti. Veriu i ishullit është i egër, me male gëlqerore që zbresin drejt detit. Familjet mund të bëjnë udhëtime panoramike drejt gjireve të Cap de Formentor, ndërsa në Pollença fëmijët luajnë në shesh dhe provojnë ensaïmadas.
Për më të rriturit ka ecje, biçikleta, shpella dhe sporte detare. Pranë Cala Ratjada gjenden gjire me rërë të butë, ndërsa Cuevas del Drach ofron një botë përrallore stalaktitesh dhe një liqen nëntokësor.
Rodosi
Për fshatra të bukur dhe surf. Lindos, në lindje të ishullit, është bazë ideale për familjet që duan plazh dhe atmosferë autentike greke. Lindos Beach ka ujëra të qeta, ndërsa më në veri është Pallas me sporte ujore.
Zona është e përshtatshme edhe për udhëtime me makinë në fshatrat malorë të jugut dhe për të provuar mjaltë e vaj ulliri vendas. Në jug ndodhet Prasonisi, i njohur për windsurf dhe kitesurf.
Gozo
Për qetësi rurale dhe histori. Vetëm 30 minuta me traget nga Malta, Gozo është më i gjelbër, më i vogël dhe më pak i vizituar. Tempulli 5,500-vjeçar Ġgantija, i mbrojtur nga UNESCO, është më i vjetër se piramidat e Egjiptit.
Fëmijëve u pëlqen edhe Ċittadella mbi qytetin Victoria. Në bregdet spikat Dwejra Bay, ndërsa Ramla Bay ofron kajak, snorkelling dhe paddleboard.
Kefalonia
Për mite greke dhe jetë plazhi. Ishulli ka male të pyllëzuara, ujëra të kthjellëta dhe plazhe të famshme si Myrtos.
Sami është pikënisje për Melissani Cave, me liqenin e saj nëntokësor. Në Parkun Kombëtar Ainos mund të bëni shëtitje ditën dhe vëzhgim yjesh natën.
Korsika
Për peizazhe bregdetare dhe natyrë të egër. Ishulli ofron gjire të bukur, fshatra të qetë dhe ferma mes ullinjve e portokalleve.
Familjet mund të pushojnë në Palombaggia ose të bëjnë udhëtime me varkë drejt Calanques de Piana. Për ata që ecin, një pjesë e shtegut GR20 është përvojë e paharrueshme.
Sardenja
Për plazhe dhe histori të lashtë. Përtej vijës bregdetare të famshme, Sardenja ka shumë vende arkeologjike të qeta për vizita familjare.
Pas plazheve të jugut si Santa Margherita di Pula, Su Giudeu dhe Tuerredda, mund të vazhdoni drejt Cagliarit dhe më pas në brendësi për të zbuluar nuraghe, kullat konike të epokës së bronzit, unike për ishullin.
Qipro
Për histori të lashtë dhe shtigje në natyrë. Në jugperëndim, Paphos bashkon kulturën, historinë dhe plazhet. Prej aty nisen lundrime drejt gjireve të fshehura, vizita në rrënoja greke e romake dhe shëtitje te Tombs of the Kings.
Më në veri, Avakas Gorge dhe Akamas National Forest Park ofrojnë ecje të buta, ndërsa Lara Beach josh me snorkelling dhe mundësinë për të parë të vegjlit e breshkave nga maji në gusht./MONITOR
