Nën akuzë për abuzim seksual ndaj të miturve, arrestohet 56-vjeçari shqiptar në SHBA

Një 56-vjeçar shqiptar, Hasan Billa, është arrestuar nga Zyra e Bostonit e Shërbimit Amerikan të Imigracionit dhe Doganave (ICE), lidhur me një hetim të fshehtë të zhvilluar më 28 maj në Hartford, për raste të dyshuara të shfrytëzimit seksual të të miturve.
Sipas mediave amerikane, ndaj tij janë ngritur akuza për tentativë për sulm seksual të shkallës së dytë, tentativë për abuzim seksual të një të mituri dhe tentativë për kontakt seksual me një person nën 16 vjeç.
Hetimi u zhvillua nga policia e Hartfordit, në bashkëpunim me Task Forcën e FBI-së për Krimet Kundër Fëmijëve dhe Trafikimin e Qenieve Njerëzore.
Sipas autoriteteve, një detektiv i infiltruar ishte prezantuar online si një vajzë 15-vjeçare. Billa dhe dy persona të tjerë dyshohet se udhëtuan drejt një adrese në Hartford për ta takuar atë.
Të tre u arrestuan pa incidente, ndërsa për secilin u vendos fillimisht një garanci prej 500 mijë dollarësh.
ICE njoftoi arrestimin e Billës më 25 shtator, duke bërë të ditur se ai ishte ndaluar gjatë operacioneve të synuara në Wolcott.
Çështja ndaj tij mbetet në proces dhe deri tani nuk ka një vendim përfundimtar gjykate. ICE nuk ka bërë publike detaje të tjera mbi statusin e tij të emigracionit apo nëse 56-vjeçari ndodhet aktualisht në paraburgimin e agjencisë.