Ndeshjet e marsit, në debutimin e Kombëtares në kualifikueset e Botërorit 2026, po afrojnë. Duhen monitoruar lojtarët e mundshëm për grumbullim dhe Sylvinho e stafi i tij janë duke bërë pikërisht këtë. Braziliani së bashku me ndihmësit e tij Doriva e Zabaleta, po vijojnë turin e vëzhgimeve dhe takimeve me futbollistët shqiptarë që luajnë në kampionatet europiane.
Pasi ishin prezent në Epet Arena në Pragë për sfidën Sparta-Inter, ku u përballën dy mesfushorët kuqezi Laçi e Asllani, këtë herë, stafi kuqezi ka udhëtuar drejt Anglisë. Çuditërisht me vonesë, sepse të enjten humbën mundësinë për të parë përfaqësimin e Bajramit në Old Trafford, në Manchester United-Rangers. Sidoqoftë, Sylvinho e të tjerët ndoqën nga afër ndeshjen mes Bristol City dhe Blackburn, për të vëzhguar sulmuesin Anis Mehmeti.
Ai është një nga lojtarët më të rëndësishëm të Bristol City, por nuk është një njohje e re, sepse Sylvinho e ka thirrur edhe më parë në kombëtare, për ta lënë më pas në harresë. Por duke qenë se Mehmeti ka spikatur me performancat e tij të mira gjatë këtij sezoni, mund të paraqitet një mundësi e re.
Në vijim, stafi teknik i Kombëtares ka planifikuar vizita të tjera, për të ndjekur nga afër lojtarët e Kombëtares që aktivizohen në Europë.
Trajneri i Kombëtares, Silvinjo, së bashku me stafin e tij teknik, Doriva dhe Zabaleta, vijojnë turin e vëzhgimeve të lojtarëve kuqezi.
ℹ️ Ditën e shtunë ata kanë ndjekur nga afër në stadium Anis Mehmetin, në ndeshjen mes Bristol City dhe Blackburn Rovers. pic.twitter.com/wEDfyhLbRz
— FSHF (@FSHForg) January 26, 2025
