Një barazim që ngjan si fitore për Napolin, i cili me barazimin 1-1 në Udine fitoi titullin e tretë në histori. Festë e madhe në Dacia Arena, gëzim i jashtëzakonshëm në Maradona ku mijëra tifozë ndoqën ndeshjen drejtpërdrejt nga 10 ekrane gjigante. I pranishëm ishte edhe presidenti Aurelio De Laurentiis, i cili ishte dukshëm i emocionuar në fushë. Presidenti falënderoi të gjithë tifozët e të kaltërve: “Më thatë se donit të fitonit dhe fituam të gjithë bashkë”.
“Faleminderit. Fituam të gjithë së bashku dhe tani të dielën me Fiorentinën jemi të gjithë këtu për festën e madhe. Faleminderit sërish të gjithëve”, tha presidenti i Napolit.
De Laurentiis më pas shtoi: “Sot është kulmi i një pritjeje që zgjati 33 vjet. Kur mbërrita këtu thashë se do të duheshin 10 vjet për të shkuar në Evropë. Premtimi u mbajt më herët. Pastaj thashë se do të fitonim titullin brenda 10 viteve. E ia dolëm përpara kohe. Tani qëllimi është ta fitojmë dhe ta fitojmë përsëri. Na mungon Champions League”.
Për fitoren që erdhi në vitin e revolucionit të ekipit: “Ky ekip ishte i rënduar me përgjegjësi. Ne kishim nevojë për ajër të pastër dhe aftësi për të fluturuar lart si grup dhe jo si individë që vozisnin si frena. Projekti nuk ndalet kurrë. Sot është një pikënisje dhe jo një pikëmbërritje”.
“Do të rinisim me teknikun Spalletti. Është kampionati i Cavani, Lavezzi, Quagliarella, Higuain. E kemi ndërtuar ndër vite, sepse siç thonë francezët, je n’ai rien de regretter”, komentoi presidenti.
