Në sfidën e javës së nëntë të Serie A, Milan rrëzohet përsëri, i mposhtur 2-1 me përmbysje nga Bologna në “Dall’Ara”. Pas një pjese të parë të mbyllur, kuqezinjtë zhbllokuan ndeshjen në minutën e 43′ falë një aksioni personal të Leao. Në fillim të pjesës së dytë, Castro barazoi shifrat nga një distancë e afërt (48’), ndërsa në minutën e 82′, Ndoye i mori kohën Pavlovic dhe përmbysi rezultatin. Me këtë fitore, Italiano ngjitet në kuotën e 44 pikëve dhe lë pas Conceicao, i cili renditet i teti me 41 pikë.
Lamtumirë Champions?
Pikërisht kur dukej se ndeshja do të përfundonte pa prishur ekuilibrat, Bologna goditi në momentin e duhur dhe siguroi një fitore 2-1 që i dhuron tre pikë të arta në garën për një vend në Champions League. Kjo ishte një sfidë direkte për vendin e katërt dhe për Milan kjo humbje është shumë e rëndë. Pothuajse një lamtumirë për ambiciet e Champions, pasi vendi i katërt tani është tetë pikë larg, ndërsa “Djalli” e gjen veten në vendin e tetë, aktualisht jashtë çdo kompeticioni evropian. Një tjetër goditje e fortë në një sezon me shumë hije.
Iluzioni Leao
Në “Dall’Ara” shënuan Leao në fund të pjesës së parë, Castro në fillim të së dytës dhe Ndoye pak minuta para fundit. U shpërblye qëndrimi më i vendosur i emilianëve, më agresivë dhe më të kthjellët, siç u pa edhe në golin e dytë: Bologna e pamëshirshme, Milan i ngrirë dhe i pashpjegueshëm. Pak para golit të 2-1, Casale kishte goditur shtyllën me kokë dhe, në përgjithësi, tre pikët e fituara nga Bologna duken të merituara, falë një qasjeje më të fuqishme në ndeshje.
