Në ditët e sotme një “unfollow” dhemb shumë më tepër se një fyerje. E kur ai që të bën unfollow është bashkëkombasi yt më i famshëm dhe, për shumë, lojtari më i mirë në historinë e futbollit, dhimbja është edhe më e madhe. Kështu ndodhi praktikisht me sulmuesin e ri argjentinas të Manchester United, Alejandro Garnacho. Vetëm pak orë më parë djaloshi u zgjua me një ndjekës më pak dhe një të rëndësishëm: Lionel Messi.
Sipas atyre që janë të mirë informuar, dhe në veçanti sipas fjalëve të ish-mbrojtësit të Manchester United, Rio Ferdinand, faji është, si gjithmonë kur flitet për Messi, i Cristiano Ronaldos.
TË PËLQEN CR7? NUK TË KAM MË “FOLLOW”
Të dielën Garnacho ishte protagonist në fitoren e Man Utd ndaj Everton, duke treguar një paraqitje të shkëlqyer. Argjentinasi zhbllokoi rezultatin me një goditje spektakolare me rovjeshatë, duke u bërë një kandidat i fortë për golin e vitit. Një sukses i cili u pasua nga një festë e stilit të Cristiano Ronaldo, me kërcimin klasik me rrotullim dhe “siuuu” finale. Madje, nuk është sekret se sulmuesi i ri e ka idhull fenomenin portugez, me të cilin ndau për pak kohë edhe dhomën e zhveshjes te Djajtë e Kuq. Por si guxon një argjentinas të preferojë CR7 para Leo Messi?
Të njëjtat këpucë sporti, të njëjtat pantallona të shkurtra, përpjekja e vazhdueshme për të imituar bëmat e tij në fushë. Për argjentinasin Garnacho, CR7 është një ikonë e vërtetë. Megjithatë, kjo duket se nuk i pëlqen bashkatdhetarit dhe kapitenit të tij të famshëm të Selecciòn Leo Messi. Pleshti mesa duket i ka hequr “follow” bashkëkombasit në Instagram. E gjatë podcastit Vibe With Five, Rio Ferdinand tregoi historinë në detaje: “Garnacho më tha se Messi nuk e ndjek më në Instagram sepse Alejandro pëlqen Ronaldon. Alejandro është argjentinas, por ai doli duke thënë ‘Cristiano është GOAT’ (Më i miri i të gjitha kohëve)”.
Kjo ka mjaftuar ta bëjë Pleshtin të vendosë të ndalojë ndjekjen e sulmuesit të ri. Kush e di se çfarë do të ndodhë kur të shihen sërish në kombëtare. Mbase Garnacho mund të festonte me një “siuuu” para fytyrës së kapitenit në ndeshje kontrolli…