Lionel Messi pësoi një lëndim shqetësues në ndeshjen e dytë të Kupës së Ligës Amerikano-Meksikane, ku Inter Miami u përball me skuadrën meksikane Necaxa.
Në minutën e 7-të, pas një depërtimi të shpejtë drejt zonës kundërshtare, Messi u rrëzua në tokë dhe qëndroi i shtrirë para se të përpiqej të vazhdonte lojën.
Megjithëse u përpoq të kthehej në fushë, pas disa minutash iu desh të kërkonte ndihmën e stafit mjekësor dhe më pas u zëvendësua, duke shqetësuar tifozët dhe stafin teknik.
Trajneri i Interit, Javier Mascherano, konfirmoi pas ndeshjes se bëhet fjalë për një dëmtim të muskujve të kofshës dhe se pritet të bëhen ekzaminime të detajuara për të përcaktuar kohën e rikuperimit.
“Messi nuk mundi të vazhdonte të luante. Do të presim përgjigjet mjekësore për të kuptuar më shumë mbi seriozitetin e dëmtimit,” tha Mascherano për mediat.
Pavarësisht mungesës së Messit, Inter Miami arriti të barazonte ndeshjen në minutën e 92-të me një gol të Jordi Albës, duke e çuar rezultatin në 2-2.
Në serinë e penalltive, ekipi i Mascheranos u tregua më i saktë, duke fituar 5-4 dhe duke siguruar pothuajse një vend në çerekfinalet e kompeticionit.
