Kylian Mbappé ka denoncuar PSG-në dhe klubi francez tani realisht rrezikon të jetë në telashe. Historia mes kampionit francez dhe klubit parisien përfundoi keq, por tani që e tashmja e sulmuesit flet spanjisht në Madrid, po dalin në dritë gjëra të mbajtura fshehur. Pasi paralajmëroi për javë të tëra, Mbappé dhe stafi i tij morën masa duke kontaktuar UEFA-n dhe Federatën Franceze të Futbollit, për t’i raportuar pagesat e munguara nga PSG.
Lajmin e ka bërë të ditur Le Monde, duke cituar edhe detajet e shifrave dhe sanksionet e mundshme për klubin nëse zbulohen mangësitë financiare ndaj Mbappé. Sulmuesi nga ana e tij ankohet për mospagimin e 55 milionë eurove, mes pagave të papaguara dhe shpërblimeve që lidhen me performancën.
Një situatë e rëndë për PSG, që nëse shpallet fajtor pas hetimeve nga organet e futbollit të thirrur në çështje nga Mbappé, rrezikon sanksione të rënda si në Francë ashtu edhe në nivel evropian. LFP mund të zgjedhë të bllokojë merkaton e transferimeve të klubit, por në horizont mund të ketë edhe heqje të licencës së UEFA-s dhe për rrjedhojë përjashtim nga Champions League.
