Sektori i Emergjencave Civile i Bashkisë Librazhd dhe salla operative e Komisariatit të Policisë kanë raportuar shfaqjen e dy problemeve serioze në territor, si pasojë e reshjeve të vazhdueshme dhe prurjeve të rritura të lumenjve.
Sipas njoftimit zyrtar, në Njësinë Administrative Mirakë është konstatuar shembja e pritës lumore pranë një Hoteli, duke krijuar rrezik potencial për zgjerimin e dëmtimit dhe afrimin e ujërave drejt godinës dhe zonës përreth. Specialistët e terrenit po vlerësojnë gjendjen për të përcaktuar masat e menjëhershme të ndërhyrjes.
Ndërkohë, një situatë tjetër problematike është regjistruar në Njësinë Administrative Hotolisht, në fshatin Xhyrë, ku është dëmtuar këmba e mesit e një ure të tipit Bailey, çka ka sjellë ndërprerjen e qarkullimit për banorët e zonës. Ura konsiderohet lidhje e rëndësishme për lëvizjen e mjeteve dhe qytetarëve, dhe dëmtimi i saj ka krijuar vështirësi të menjëhershme në komunikim.
Bashkia Librazhd ka ngritur menjëherë dy grupe pune, të cilat janë nisur në terren për të inspektuar nga afër situatat e krijuara dhe për të vlerësuar masat e nevojshme për normalizimin e gjendjes. Burime nga Emergjencat Civile bëjnë me dije se vlerësimi i detajuar i dëmeve dhe planifikimi i ndërhyrjeve efektive pritet të përditësohet në orët në vijim.
Autoritetet u bëjnë apel banorëve të zonave të prekura të tregojnë kujdes dhe të respektojnë udhëzimet e strukturave përgjegjëse, deri në stabilizimin e plotë të situatës.
