Një faqe e re shkruhet në historinë e futbollit shqiptar në Maqedoninë e Veriut. Shkëndija e Tetovës ka arritur një nga sukseset më madhështore në arenën ndërkombëtare, duke eliminuar një emër të madh të futbollit europian, Steaua Bukuresht, me dy fitore në të dyja takimet e turit të dytë kualifikues të Champions League. Tetovarët fituan fillimisht në Shkup me rezultatin 1-0, por ajo që ndodhi në Bukuresht ishte vërtetë legjendare: një përmbysje spektakolare me shifrat 1-2 që i çon ata me meritë në turin e tretë, ndërsa njëkohësisht i garanton minimalisht pjesëmarrjen në fazën e grupeve të Conference League.
Cake sheh grupet e Champions: Kur mundëm Steaua…!
Klisman Cake, qendërmbrojtësi i tetovarëve nuk vendos limite për Shkëndijën, i bindur se edhe grupet e Champions League mund të arrihen. “Kur kemi eliminuar një skuadër si Steaua Bukuresht gjithcka mund të ndodhë. Mund të arrijmë në grupet e Europa League, por pse jo edhe në ato të Champions”.
Ndërkohë që skuadra rumune shënoi e para në ndeshjen e kthimit, Shkëndija reagoi me personalitet dhe qetësi. Liridon Latifi barazoi shifrat përpara pushimit, duke rikthyer besimin dhe kontrollin e lojës. Kur ndeshja dukej se do të shkonte drejt një barazimi, ishte Krstevski që vulosi triumfin me një gol të vonë në minutën e 87-të, duke çuar në delir stafin dhe tifozët tetovarë. Një sukses i ndërtuar me karakter, përgatitje dhe besim.
Shtypi rumun: “Katastrofë kombëtare”, “Eliminim që turpëron futbollin tonë”
Reagimet në Rumani pas eliminimit ishin të ashpra dhe të menjëhershme. “Gazeta Sporturilor” e quajti disfatën si “një nga humbjet më të turpshme në historinë moderne të klubit”. “Fakti që Steaua eliminohet nga një skuadër e panjohur për pjesën më të madhe të publikut tonë tregon krizën e thellë që kalon futbolli rumun,” shkruante “ProSport”, ndërsa “DigiSport” fliste për “katastrofë kombëtare në futbollin rumun”, duke shtuar se “Shkëndija tregoi se organizimi dhe zemra mund të mposhtin emrin e madh.”
Shtypi maqedonas: “Shkëndija bëhet krenaria e futbollit tonë”
Në Maqedoninë e Veriut, reagimet ishin entuziaste dhe plot krenari. “Sport1.mk” e përshkroi mbrëmjen si “nata më e lavdishme në historinë e Shkëndijës”, ndërsa “Ekipa.mk” theksoi se “tetovarët i treguan gjithë Europës se edhe futbolli ynë ka dinjitet dhe mundësi të mëdha”. Portale të ndryshme sportive në vend e cilësuan Jeton Beqirin si “arkitektin e një ëndrre që u kthye në realitet” dhe folën për një skuadër që tani nuk është më surprizë, por realitet i fortë në skenën europiane.
Shkëndija tashmë shkruan emrin e saj mes elitës
Me këtë sukses, Shkëndija jo vetëm që hedh një hap drejt ëndrrës për t’u kualifikuar në fazën e grupeve të Champions League, por siguron automatikisht edhe prezencën në një kompeticion europian deri në fund të sezonit. Diçka që jo vetëm për klubin, por për gjithë futbollin shqiptar në Maqedoninë e Veriut përbën një arritje të jashtëzakonshme.
Tani, para skuadrës së Jeton Beqirit janë sfida edhe më të mëdha, por një gjë është e sigurt: ajo që ndodhi ndaj Steauas do të mbetet gjatë në kujtesën e të gjithë atyre që e ndjekin këtë klub dhe futbollin në rajon.
