Nga golat në La Liga dhe Premier League te setet kinematografike. John Carew, ish-sulmuesi norvegjez që ka kaluar edhe te Roma, por i njohur për sezonet te Valencia dhe për golat në Premier League me Aston Villa, po jeton një jetë të dytë si protagonist, këtë herë larg fushave të futbollit. Pas tërheqjes nga futbolli dhe pasi ka shlyer një dënim, ish-bomberi është afirmuar si aktor, duke arritur edhe në produksione të Netflix.
Në vitin 2022 Carew u dënua me 14 muaj burg në Norvegji për evazion fiskal, pasi pranoi se nuk kishte deklaruar të ardhura dhe pasuri për mbi 26 milionë euro mes viteve 2014 dhe 2019. Mbyllur ajo periudhë, 46-vjeçari ka vendosur të rilançojë veten në botën e spektaklit, duke kultivuar një pasion që kishte nisur ta eksploronte që kur ishte ende futbollist.
Ëndrra është e qartë dhe e deklaruar pa rrotullime fjalësh: “Do të doja të isha i keqi në një film të James Bond”. Një ide që Carew e ka shpjeguar më mirë, duke treguar për The Athletic rolin që do t’i pëlqente të interpretonte: “Dua të jem krahu i djathtë i të keqit, si një vrasës i heshtur që humbet një përplasje me Bond në mes”.
Nga futbolli te seti: jeta e dytë e John Carew
Varur këpucët në gozhdë në vitin 2012 pas eksperiencës së fundit te West Ham, Carew ka treguar se kishte nisur të studionte aktrim që në vitin 2009: “Kam filluar të marr mësime aktrimi në 2009” dhe interesi për këtë botë kishte lindur gradualisht, gjatë viteve të fundit të karrierës. “Si i ri i jam përkushtuar plotësisht futbollit, dhe kjo ka ndodhur pak më vonë, pa asnjë përvojë të mëparshme në këtë fushë. Ishte të mësuarit e teorisë dhe aspekteve teknike të aktrimit ajo që më tërhoqi vërtet”.
Debutimi në ekranin e madh erdhi në vitin 2014 me horrorin kanadez Dead of Winter, i ndjekur në 2015 nga Caudillos. Në vitet në vijim ai ka marrë pjesë në disa produksione norvegjeze, mes tyre seriali i suksesshëm Home Ground (Heimebane), përpara se të arrinte në tituj më të njohur si thrilleri Black Frost dhe Maleficent me Angelina Jolie.
Carew, nga futbolli në kinema: ëndrra është Hollywood
Carew sheh shumë afinitete mes futbollit dhe aktrimit: “Si lojtar, je mësuar me presionin, kështu që ka ngjashmëri. Të punosh me të tjerët është punë skuadre”. Një koncept që ai e përsërit shpesh, duke theksuar se edhe në set, ashtu si në fushë, rezultati varet nga angazhimi kolektiv.
I rezervuar nga natyra, ish-sulmuesi ka pranuar se nuk i ka dhënë kurrë shumë peshë kësaj thirrjeje të re gjatë viteve si futbollist: “Nuk besoj se kam thënë shumë gjëra te shokët e skuadrës. Nuk i kam dhënë shumë rëndësi. Nuk jam nga ata njerëz që flasin gjithmonë për gjërat, përveçse kur është e nevojshme”. Më pas, sapo ndaloi së luajturi, koha në dispozicion bëri pjesën tjetër: “Pastaj, kur dola në pension, kisha më shumë kohë”.
Sot John Carew po shijon këtë fazë të re të jetës së tij, me një objektiv ambicioz, por të mirëpërcaktuar: të shndërrojë praninë e tij imponuese fizike dhe përvojën nën presion në rolin perfekt, ndoshta një ditë, për t’u bërë vërtet i keqi i James Bond.
