Një “kartë” që do t’u flasë zemrave të amerikanëve, ndoshta më shumë se Irani, mund të luhet nga zëvendëspresidenti i SHBA-së J.D. Vance, i cili zbuloi se është “i fiksuar pas kësaj çështjeje”.
“Jam i vendosur ta hetoj çështjen e alienëve deri në fund para se të largohem nga detyra”, – tha ai në një intervistë disa ditë më parë.
“Më besoni, kushdo që është kurioz për këtë, unë jam më kurioz se kushdo tjetër, dhe kam pasur tre vjet qasje në dosjet më të klasifikuara. Do t’i shkoj deri në fund” – tha ai në një episod të podkastit të komentatorit konservator Benny Johnson.
Johnson e pyeti Vance nëse administrata Trump do të publikonte të gjitha dosjet e saj të UFO-ve dhe nëse ai u kishte “hedhur një sy” ndonjërës prej tyre.
“Në fakt, nuk e kam bërë” – u përgjigj Vance. “Nuk kam qenë në gjendje t’i kushtoj kohë të mjaftueshme, por do ta bëj. Më besoni, jam i apasionuar pas saj.”
Vance tha gjithashtu se më parë kishte planifikuar udhëtime në “Zonën 51”, objektin ushtarak tepër sekret në shkretëtirën e Nevadës e cila ka qenë në qendër të komploteve mbi alienët – dhe në New Mexico – por nuk gjeti kurrë kohën e duhur.
Më pas ai sugjeroi që koncepti i alienëve është një përpjekje njerëzore për të shpjeguar të pashpjegueshmen, duke thënë se beson se ekziston një forcë e ndryshme pas këtij fenomeni.
“Nuk mendoj se janë alienë, mendoj se janë demonë gjithsesi, por kjo është një bisedë më e madhe”, – tha Vance, duke e nxitur Johnson të kërkojë sqarime.
“Dua të them, çdo fe e madhe botërore – përfshirë Krishterimin, në të cilin besoj unë – e ka kuptuar se ka gjëra të çuditshme atje jashtë, dhe ka gjëra që janë shumë të vështira për t’u shpjeguar”, – tha ai.
Komentet e tij vijnë pas deklaratave të ish-Presidentit Barack Obama, i cili shkaktoi një valë interesi mes amerikanëve kur tha në një podcast tjetër muajin e kaluar se alienët janë “të vërtetë”, por se ai nuk i kishte parë ata dhe se ata nuk mbaheshin në “Zonën 51”.
Të nesërmen, Obama u përpoq të kundërshtonte komentet e tij, duke thënë se “nuk kam parë asnjë provë gjatë presidencës sime që alienët na kanë kontaktuar”.
Presidenti Trump u zotua disa ditë më vonë të urdhëronte Departamentin e Mbrojtjes dhe agjencitë e tjera të publikonin të dhënat e tyre mbi UFO-t dhe “jetën jashtëtokësore”, duke përmendur “interesin e jashtëzakonshëm”.
Ai u kishte thënë më parë gazetarëve se nuk e dinte nëse alienët ishin të vërtetë dhe se “kjo mund t’i kursente disa telashe” duke deklasifikuar të dhënat, duke iu referuar Obamës.
Shtëpia e Bardhë regjistroi domenet “alien.gov” dhe “aliens.gov” në fillim të këtij muaji, duke nxitur spekulime se informacioni mund të publikohej së shpejti.
