Harry Kane ka dhënë sinjalin më të qartë deri tani për të ardhmen e tij te Bayern Munich, pasi ka konfirmuar se së shpejti do të nisë bisedimet me drejtuesit e klubit për zgjatjen e kontratës.
Sulmuesi anglez është në kontratë me kampionët e Gjermanisë deri në vitin 2027, por negociatat për një marrëveshje të re pritet të nisin gjatë javës së ardhshme ose asaj pasuese.
“Kam vetëm edhe një vit të mbetur në kontratën time, kështu që tani është koha të flasim për këtë. Do të diskutojmë javën e ardhshme ose javën pas saj. Të dyja palët janë shumë të qeta për këtë çështje”, deklaroi Kane.
Bayern synon ta mbajë 33-vjeçarin për një periudhë afatgjatë dhe raportohet se klubi po shqyrton mundësinë e zgjatjes së kontratës deri në vitin 2029, me opsion për një tjetër sezon.
Kane është kthyer në një prej liderëve të ekipit bavarez që prej transferimit nga Tottenham dhe është shprehur i lumtur në Munich, ku jeton së bashku me familjen e tij.
