Kylian Mbappé ishte mungesa e madhe e El Clasico-s së mbrëmshme mes Barcelonës dhe Real Madrid. Sulmuesi francez ishte stërvitur gjatë javës duke bërë gjithçka për të qenë prezent, por kur dukej se prania e tij ishte e sigurt, erdhi tërheqja në mëngjes. Pesë minuta para fundit të seancës së fundit, lojtari u largua për shkak të një shqetësimi në muskujt e pasëm të kofshës, gjë që e detyroi Arbeloan të ndryshonte të gjitha planet. Dhe të mendosh që analizat klinike kishin treguar se Mbappé ishte rikuperuar plotësisht nga dëmtimi muskulor.
I mbetur jashtë ndeshjes, Mbappé u sistemua rehat në shtëpinë e tij, në divan, për të ndjekur sfidën. Siç u pa në një “story” të publikuar në Instagram, lojtari, tashmë në polemikë me një pjesë të tifozëve të Realit, publikoi një foto të ndeshjes në televizor ku shihej qartë rezultati 2-0 për katalanasit që kishte mbyllur pjesën e parë. Poshtë kishte shkruar: “Hala Madrid”. Një tallje për disa tifozë që nuk e vlerësuan aspak kohën dhe mungesën e delikatesës në publikimin e asaj fotoje, sikur po ironizonte Arbeloan.
Pra, rrëfimet mbi situatën e krijuar te Real Madrid pasurohen me elementë të rinj. Mbappé ishte vënë menjëherë në shënjestër për pushimet e papritura në Cagliari, Itali, me të dashurën e tij – aktoren Ester Exposito – ndërsa po rikuperohej nga dëmtimi. Për tifozët e Realit ishte një sjellje absolutisht mosrespektuese ndaj shokëve të skuadrës, klubit dhe tifozëve, sidomos në prag të El Clasico-s.
Në rrjetet sociale peticioni për largimin e tij nga Real Madrid u përhap dita-ditës. “MbappéOut” u bë menjëherë viral deri në rikthimin e francezit në stërvitje. Mes çështjes së sherrit Valverde-Tchouameni, sulmuesi francez u filmua duke qeshur teksa largohej nga qendra stërvitore me makinën e tij. Një tjetër mungesë respekti që tifozët e Realit nuk e prisnin. E tani, veprimi i tij u duk si një autogol.
