Behgjet Pacolli ka reaguar pas vendimit të Qeverisë shqiptare për ndërprerjen e kontratës së koncesionit për Aeroportin e Vlorës, duke i bërë thirrje ekzekutivit të tërhiqet nga përshkallëzimi i konfliktit dhe të rikthehet te dialogu.
Pacolli thotë se MABCO, investitori dhe financuesi i projektit, i është drejtuar arbitrazhit ndërkombëtar pasi qeveria ndërpreu kontratën në mënyrë të njëanshme. Sipas tij, më 16 shtator 2026, arbitra e emergjencës e ICC-së ka urdhëruar Ministrinë e Infrastrukturës dhe Energjisë të përmbahet nga çdo veprim që mund të përkeqësojë mosmarrëveshjen gjatë procedurës së emergjencës.
Në reagimin e tij, Pacolli kërkon rikthimin e “legjitimitetit” në kompaninë VIA, respektimin e investimit të MABCO-s dhe vazhdimin e punimeve për përfundimin dhe vënien në funksion të Aeroportit të Vlorës.
Reagimi i Behgjet Pacollit:
APEL PUBLIK PËR QEVERINË E SHQIPËRISË
Pas vendimit të njëanshëm të Qeverisë për ndërprerjen e kontratës së koncesionit për Aeroportin e Vlorës, MABCO, investitori dhe financuesi i këtij projekti, si dhe zotëruesi i 98% të kuotave të VIA-s, u detyrua, në përputhje me kushtet kontraktuale, t’i drejtohej arbitrazhit ndërkombëtar për mbrojtjen e të drejtave dhe investimit të saj.
Më 16 shtator 2026, arbitra e emergjencës e ICC-së, në kuadër të procedurës me seli në Londër, nxori një urdhër paraprak që i kërkon Ministrisë së Infrastrukturës dhe Energjisë të përmbahet, gjatë procedurës së emergjencës, nga çdo veprim lidhur me ndërprerjen e koncesionit që mund të përkeqësojë mosmarrëveshjen ose të cenojë këtë procedurë. Ky urdhër duhet respektuar.
I bëj thirrje Qeverisë që të rishqyrtojë qëndrimin e saj dhe të krijojë kushtet për një dialog institucional dhe konstruktiv.
MABCO NUK KA SYNUAR zgjidhjen e kësaj çështjeje përmes ARBITRAZHIT. Përmes më shumë shkresave, tentativave për takim, thirrjeve për veprime konstruktive dhe shmanjen e pëngesave, kemi kërkuar vazhdimisht zhvillimin e bisedimeve dhe arritjen e një marrëveshjeje civilizuese që do të mundësonte vazhdimin e punimeve dhe përfundimin e aeroportit.
Propozimi ynë mbetet i qartë: të na mundësohet përfundimi i aeroportit dhe vënia e tij në funksion.
Në këtë fazë, kërkojmë që në VIA të këthehet legjitimiteti, puna dhe investimi ynë të respektohen dhe që procesi i përfundimit të aeroportit të vijojë.
I bëj thirrje Qeverisë edhe një herë të zgjedhë dialogun dhe një zgjidhje të dakordësuar. Përfundimi i kësaj vepre dhe vënia e saj në shërbim të qytetarëve, turizmit dhe ekonomisë shqiptare do të ishte në interes të publikut dhe do të shmangte shpenzime të konsiderueshme për procedura ligjore.
