Gjykata e Posaçme kundër Korrupsionit dhe Krimit të Organizuar ka vendosur të zbusë masën e sigurisë për kryetarin e bashkisë Tropojë, Rexh Byberi, dhe nënkryetarin Abedin Kërrnaja, të cilët ishin nën masën e arrestit shtëpiak.
Vendimi i fundit i togave të zeza përcakton për të dy të hetuarit ‘detyrimin për paraqitje’ një herë në muaj.
Sipas avokatëve mbrojtës, masa e mëparshme e arrestit shtëpiak ka kaluar afatin 6-mujor të përcaktuar nga ligji, duke iu referuar si precedent vendimit të Gjykatës Kushtetuese për rastin e Mimoza Margegajt.
Rexh Byberi dhe Abedin Kërrnaja po hetohen për veprat penale të “shpërdorimit të detyrës” dhe “prerjes së paligjshme të pyjeve”, në kuadër të një çështjeje që lidhet me hapjen e një rruge në territorin e Bashkisë Tropojë.
Sipas Prokurorisë së Posaçme, hapja e rrugës me gjatësi 3.2 kilometra, që në pjesën më të madhe përkon me një rrugë këmbësore ekzistuese, është kryer pa ndjekur procedurat ligjore të domosdoshme.
Nga hetimet rezulton se nuk është aplikuar në sistemin elektronik “e-leje”, siç kërkohet për ndërtimet publike nga njësitë vendore. Po ashtu bashkia nuk ka bashkëpunuar me Agjencinë Kombëtare të Mjedisit, për hartimin e Raportit të Vlerësimit të Ndikimit në Mjedis.
Po ashtu, nuk është bashkërenduar puna me ministrinë përkatëse të linjës, për të vlerësuar impaktin dhe pasojat e ndërtimit të rrugës.
Në një seancë të mëparshme, gjykata i kërkoi Prokurorisë të marrë në pyetje ekspertët teknikë, që kanë përcaktuar dëmin mjedisor dhe ekonomik të shkaktuar nga ndërhyrja.
Hetimet për këtë çështje vijojnë, ndërsa dy zyrtarët lokalë do të përballen me drejtësinë në gjendje të lirë, me detyrim paraqitjeje.
