Maifredi e Thiago Motta. Dy emra që në historinë e Juventus janë si ajsbergët që kanë shkaktuar disa nga mbytjet më të mëdha dhe më të bujshme të anijes bardhezi në kohët e fundit. Ekziston edhe një emër i tretë, Pep Guardiola, i cili do të kishte efektin e një elektroshoku në një ambient të trullosur, të hutuar dhe të pakënaqur. Gigi e lëshon bombën, duke u distancuar nga një krahasim i pakëndshëm dhe duke vepruar si një orakull që lexon të ardhmen.
Dy trajnerë të lidhur nga një emërues i përbashkët: të dy ish-trajnerë të Bologna, të dy të shkarkuar sepse gjërat shkuan keq/shumë keq në krahasim me pritshmëritë, ambiciet, investimet, atë që duhej të ishte (lojë e bukur) dhe atë që realisht ndodhi (një dështim total). “Por ka një ndryshim,” shpjegon Maifredi. “Ai (Motta) u thirr nga John Elkann dhe Giuntoli për të përmirësuar lojën, ndërsa unë duhej të shkatërroja të kaluarën dhe të vendosja një epokë të re kundër lojës tradicionale italiane”.
Giuntoli ka fajet e tij
Atëherë (në vitet ’90) si edhe sot, Juventus ka kaluar nga filozofia “fitorja është e vetmja gjë që ka rëndësi” te objektivat minimale: një vend i katërt në Champions për të shpëtuar sezonin dhe bilancin financiar. “Thiagos i ndodhi e njëjta gjë: ai mbërriti në Torino duke besuar se ishte një zot mbi tokë, por u përplas me realitetin e dhomës së zhveshjes, me ata lojtarë që nuk mund t’i trajtosh sikur të ishe ende te Bologna. Dhe gjithashtu me drejtorin Giuntoli, i cili nuk e ndihmoi aspak, ashtu siç nuk e kishte ndihmuar më parë as Allegrin.” Me pak fjalë: ai nuk u tregua një drejtues në lartësinë e rolit dhe situatës.
Mendimi i mëpasshëm i Maifredi shpjegon pse katastrofa e këtij sezoni i atribuohet edhe drejtorit sportiv, i cili ndërtoi një karrierë mbresëlënëse te Napoli, por në Torino ka zhgënjyer pronësinë dhe ka shpërdoruar kredinë e besimit që i ishte dhënë kur iu dorëzuan “çelësat e shtëpisë”. “E la teknikun Motta të mbytej,” deklaroi ish-trajneri në një intervistë për gazetën Libero. “Do t’i kishte shërbyer një figurë si Luciano Moggi në zgjedhjet e merkatos dhe jo vetëm… sepse përveç tij, kishte edhe një menaxher si Giraudo dhe një këshilltar si Bettega. Giuntoli, në vend të kësaj, donte t’i bënte të gjitha vetë”
Guardiola trajneri i ri
Si mund të dalë Juventus nga ky ngërç në të cilin është bllokuar? Shumëçka varet nga përfundimi i sezonit në Serie A dhe pozicioni në renditje. Në thelb, ose Exor do të injektojë (sërish) para në arkat e klubit, ose do të nisë një plan shitjesh dhe shkurtimi kapitalesh që do të ishte shkatërrues. Por ekziston edhe një rrugë e tretë, e cila kalon përmes një emri të madh për rilindjen e Juventus. “Tudor është vetëm një trajner i përkohshëm. Lëvizja e madhe që Juventus ka në mendje është Guardiola (një emër që është përmendur edhe në të kaluarën, përpara se të mbërrinte Maurizio Sarri, një tjetër ish-trajner i Napolit që erdhi te bardhezinjtë përmes Chelseat, red.).”
E nuk ka rëndësi që ai është i lidhur me Manchester City me kontratë deri në vitin 2027. Për Maifredi është një detaj që mund të anashkalohet. “Pep është më i miri nga të gjithë dhe unë jam i bindur se ai dëshiron të vijë këtu tek ne. Serie A është i vetmi kampionat që ai nuk e ka fituar ende pas La Liga, Bundesliga, Premier League.”
