Garda Revolucionare e Iranit ka kërcënuar Shtetet e Bashkuara për zgjerim të konfliktit përtej Lindjes së Mesme, nëse ndaj Iranit ndërmerren sërish sulme ushtarake. Në një deklaratë të fortë, forca elitare ushtarake iraniane u shpreh se po i përgjigjet kërcënimeve të asaj që e cilëson si “armiku amerikano-sionist”, pas paralajmërimeve nga presidenti amerikan Donald Trump dhe JD Vance për mundësi rifillimi të sulmeve në mungesë të një marrëveshjeje paqeje me Teheranin.
“Ne ende nuk i kemi vendosur të gjitha kapacitetet e Revolucionit Islamik kundër tyre,” thuhet në deklaratë. Më tej, Garda Revolucionare paralajmëron se në rast të një agresioni të përsëritur, “lufta e premtuar rajonale këtë herë do të shtrihet përtej rajonit” dhe se do të ketë “goditje shkatërruese në vende të papritura”.
Përplasjet vijnë në një moment tensionesh të larta mes Teheranit dhe Uashingtonit, ndërsa Irani më herët ka ndërmarrë sulme hakmarrëse ndaj vendeve të përfshira në fushatat ushtarake SHBA-Izrael në rajon. Ndërkohë, sipas raportimeve, ekzistojnë edhe shqetësime për përshkallëzim të mundshëm të një “lufte hibride” jashtë rajonit. Policia Metropolitane në Londër po heton lidhje të mundshme mes disa sulmeve me zjarrvënie dhe grupeve të dyshuara si të lidhura me Iranin.
