Filmi biografik i ri për Michael Jackson ka arritur një sukses të madh në arkat globale, duke u renditur si filmi i dytë më fitimprurës biografik i të gjitha kohërave.
Sipas të dhënave të publikuara nga Deadline, projekti ka arkëtuar rreth 577 milionë dollarë që prej daljes në kinema më 24 prill. Vetëm në fundjavën e tretë, filmi shtoi 95 milionë dollarë, duke e çuar totalin në 240.4 milionë dollarë në SHBA dhe 336.88 milionë dollarë ndërkombëtarisht.
Filmi “Michael”, ku rolin kryesor e luan nipi i këngëtarit, Jaafar Jackson, ka kaluar në renditje filmin “Elvis” (2022) me Austin Butler, i cili kishte arkëtuar rreth 288.7 milionë dollarë globalisht.
Në krye të listës mbetet “Bohemian Rhapsody” për Freddie Mercury, i cili ka gjeneruar rreth 910.8 milionë dollarë në total.
Produksioni i regjisorit Antoine Fuqua kishte një hapje rekord, me 97 milionë dollarë në SHBA dhe 120.4 milionë dollarë jashtë saj, duke shënuar një nga debutimet më të forta për një biografi muzikore.
Filmi ka performuar veçanërisht mirë në tregjet evropiane, duke kryesuar në Francë, Britani, Gjermani, Itali dhe Brazil.
Pavarësisht suksesit në kinema, filmi ka hasur kritika të forta, veçanërisht për faktin se nuk trajton akuzat për abuzim seksual që kanë shoqëruar jetën e këngëtarit. Në “Rotten Tomatoes” ai ka marrë vlerësim të ulët kritikësh, por është pritur më mirë nga publiku.
Sipas raportimeve, buxheti i filmit ka qenë rreth 200 milionë dollarë, duke e bërë një nga prodhimet më të kushtueshme të zhanrit.
Pavarësisht polemikave, “Michael” është bërë debutimi më i suksesshëm i studios Lionsgate pas pandemisë dhe një nga filmat më të mëdhenj të vitit në box office.
Filmi pritet të vazhdojë shfaqjen në tregje të tjera, përfshirë Japoninë, ku parashikohet një tjetër valë e fortë shitjesh në bileta.
