Në atmosferën e trazuar të Milanellos, dukej se fati i Igli Tare ishte vulosur tashmë, me drejtorin sportiv të destinuar të largohej nga kuqezinjtë pas vetëm një sezoni. Megjithatë, me largimin gjithnjë e më të mundshëm të Giorgio Furlani, ish-drejtori sportiv i Lazios po sheh në mënyrë të bujshme rritjen e kuotave të tij për të qëndruar. “Përmbysje te Milan: Tare ngjitet sërish”, shkruan Tuttosport, duke hedhur dritë të re mbi një situatë ende të paqartë.
Maignan “blindon” Taren. Dhe është edhe mbështetja e Allegrit
Një nga faktorët vendimtarë që mund të ndikojë në të ardhmen e Drejtorit Sportiv Igli Tare është mbështetja e marrë nga brenda skuadrës. Trajneri Massimiliano Allegri ka shprehur publikisht vlerësimin e tij për punën e bërë nga drejtuesi shqiptar. Por ajo që po peshon shumë në dhomat e zhveshjes së Milan ka qenë kërkesa e qartë për konfirmimin e tij nga një prej liderëve të grupit, Mike Maignan, i cili pas fitores kundër Genoas i ka kërkuar Drejtorit Sportiv të qëndrojë në Milano edhe sezonin e ardhshëm.
Modric dhe zgjedhjet në merkato
Thuhet se në dobësimin e pozicionit të Tares kanë ndikuar disa investime në merkato që rezultuan të gabuara. Por në Milano askush nuk mund të injorojë faktin se ishte pikërisht drejtori aktual sportiv ai që solli Luka Modric te kuqezinjtë, një goditje që sigurisht ka rritur nivelin teknik dhe mediatik të skuadrës. Ky aspekt nuk duhet të kalojë pa u vënë re, sidomos në dritën e kritikave të Gerry Cardinale për mënyrën se si janë përdorur fondet.
Kritikat e pronësisë dhe e ardhmja e Milan
Giorgio Furlani nuk ka qenë i vetmi që ka shfaqur pakënaqësi për disa zgjedhje drejtuese. Gerry Cardinale, në disa intervista të fundit, ka kritikuar mënyrën se si janë investuar paratë në merkato. Megjithatë, kritikat duket se nuk i drejtohen drejtpërdrejt Tares, i cili gëzon një mbështetje të caktuar brenda klubit.
Çfarë kishte thënë Tare për të ardhmen e tij
I intervistuar pas humbjes kundër Atalantës, Tare kishte folur për të ardhmen e tij: “Sinqerisht nuk kam marrë asnjë sinjal nga klubi. Jam totalisht i përqendruar te puna. Nëse arrijmë objektivin, kemi bërë një punë të madhe. Gjithçka tjetër është pjesë e profesionit tonë, të gjitha spekulimet…”. Fjalë që kishin lënë të hapur derën për shumë skenarë.
Atmosfera në Milanello mbetet gjithsesi elektrike dhe javët e ardhshme do të jenë vendimtare për të përcaktuar fatin e Tares dhe drejtuesve të tjerë, nga Furlani te Ibrahimovic e deri te Moncada. Ndërkohë, fillimisht duhet siguruar vendi në Champions League, më pas nga e hëna do të bëhen bilancet dhe do të nisin vendimet e zgjedhjet.
