Janë 15 pikë në lojë, që i japin të drejtë Massimiliano Allegrin të përsërisë një të vërtetë konkrete që kapërcen pengesat gjyqësore. Vendimi i CAS praktikisht detyron Covisoc dhe Prokurorinë Federale t’ua dorëzojnë avokatëve të Juventusit atë që quhet “dokumenti sekret”. Dokumenti i famshëm dhe i mohuar deri më tani, jep ndjesinë se procesi i fitimeve kapitale mund të përfundojë në një flluskë sapuni. Kolegji i garancisë në Coni në fakt mund të anulojë dënimin duke i kthyer 15 pikët e hequra Juventusit. Është një cështje proceduriale, sa për sqarim. Pra, mosrespektimi i afateve nga Chiné. Nuk ka lidhje me pafajësinë apo mosekzistencën e fakteve. Por gjithsesi, ky është ligji dhe duhet respektuar.
Fakti është se renditja e Serisë A mund të ridizenjohet përsëri. Atëherë Juventus do të kthehet në vendin e dytë së bashku me Interin. Një kapërcim për të cilin flet Allegri e që do të përziejë kartat e një gare tashmë mjaft të komplikuar për Champions.
SI MUND TË NDRYSHOJË SITUATA?
Deri më sot dhe pa të gjitha përplasjet direkte që do të peshojnë në rast të pikëve të barabarta, katër vendet shkojnë për Napolin, Interin, Lazion dhe Romën. Megjithatë, nëse do të ktheheshin 15 pikët për Juventus, Serie A do të prezantohej me Napolin, Juventus, Inter dhe Lazio në Champions League. Roma e Milan në këtë rast do të shkonin në Europa League. Një revolucion i vërtetë krahasuar me luftën aktuale, që, dhe nuk duhet nënvlerësuar, mund të trazohet sërish nga procesi i pagave dhe nga vendimi i UEFA-s. Institucioni, siqoqoftë, mund të vendosë përjashtimin e bardhezinjve nga garat e saj.
Ndërkohë, dokumenti sekret nuk shqetëson vetëm prokurorët federalë. Por edhe të gjithë pretendentët aktualë për një vend në Champions League. Rruga, nuk duhet harruar, është ende e gjatë, por në Torino, ndoshta për herë të parë, tani ka njëfarë optimizmi. Dukej si një luftë e humbur, por në vend të kësaj ishte thjesht një betejë. E ende konflikti nuk ka përfunduar.
