Dinamo e Egnatia në shtëpi, Vllaznia e vetmja në transfertë: të treja sidoqoftë fituese në ndeshjet e para të raundit të dytë të Conference League. Tre skuadrat shqiptare kërkojnë arritjen historike, kurrë më parë nuk kanë shkuar në raundin e tretë të një kompeticioni europian dhe kjo duket hera e duhur.
Vllaznia, një gola për tu mbrojtur në Rekjavik
Nuk ishte starti më premtues në aventurën Europiane, por mund të shndërrohet në historike. Vllaznia e gjen veten tani për herë të parë 90 minuta larg raundit të tretë të Conference League, me një gol avantazh dhe disa nxitje motivuese për ta bërë skuadrën e Edi Martinit edhe më kurajoze në transfertën e Rekjavikut, një nga ato vende që nuk është se sjell kujtime të mira për ekipet tona.
E megjithatë nga debutimi me humbje në Elbasan Arena kundër një Daugavpilsi anonim, shkodranët kanë ndryshuar marsh jo vetëm fizik e në kuadër loje, por edhe mental. Shërbeu ndoshta transferta letoneze, me atë përmbysje 2-4, frymëzuar nga ndeshja e fundit me fanellën kuqeblu të Dodajt përpara transferimit në Sofje. Kuqeblutë që u kthyen në Shkodër, për të luajtur takimin e tyre të parë sezonal përpara publikut në Loro Borici, ishin tjetër në bindjen e krijuar mbi potencialin në zotërim dhe Martini mes detyrimit e zgjedhjeve është më i qartë për atë si mund të marrë më shumë nga skuadra e tij.
Karakeri i treguar në përmbysjen e Vikingur është më i vlefshëm se vetë 2-1 me të cilin shkodranët shkojnë në Rekjavik. Vikingur nuk është fare një kundërshtar i lehtë, ka avantazhin fizik, por duhet të bëjë llogaritë me një Vllaznia në rritje progresive, që nëse kalon përtej, bëhet akoma edhe më e rrezikshme.
Egnatia, për një tjetër herë të parë
Në Rrogozhinë ka ankth e entuziazëm, në pritje të kthimit të raundit të dytë të Conference League kundër Dinamo Minsk. Në Arena Egnatia, kampionët e Shqipërisë do të presin bjellorusët, me dy gola në favor të skuadrës së Tetovës dhe një takimi të lënë me historinë. Trauma e pësuar me Breidablik u kalua në Hungari me golat e Lushkjes dhe Bakayoko, por asgjë nuk është e përfunduar: një fillim të mirë rrogozhinasit e patën edhe në debutimin në Champions në raundin e parë, kur morën fitoren e parë europiane në histori në Arena Egnatia, përpara se islandezët e Breidablik t’i tupëronin në kthim.
Gjërat kanë ndryshuar këtë herë, jo sepse avantazhi është i dyfishtë, por është marrë edhe në transfertë e tani në Rrogozhinë kërkohet një tjetër herë e parë. Në tre sezone, asnjëherë Egnatia nuk ka arritur të kalojë një tur në Europë, e pas fitores së parë në shtëpi kërkohet tani edhe kualifikimi i parë. Tetova e ka të qartë çfarë kërkohet nga skuadra e tij në këtë përballje me bjellorusët: gabimet e bëra me Breidablik nuk mund të përsëriten, Dinamo Minsk mund të bëhet një kundërshtar i rrezikshëm nëse gjërat merren të mirëqena. Egnatia, megjithatë, në këtë 3 vjecar dominimi në Shqipëri ka krijuar staturën e saj, që duhet të kompletohet tani me kalimin e një emri të rëndësishëm si kampionët e Bjellorusisë.
Dinamo, me një Itodo më shumë
Dinamo ka për të mbrojtur në shtëpi një fitore me përmbysje 1-2 në ndeshjen e parë në Andorra. Etletic Escaldes nuk duket një kundërshtar që mund ti krijojë probleme bluve vecanërisht jashtë fushës së tyre, por në Europë asnjë kundërshtar nuk duhet nënvleftësuar. Problem për Ilir Dajën do të jetë mungesa e Rustem Hoxhës, që me shumë mundësi do të zëvendësohet nga Dita, ndërsa përpra rikthehet Itodo Mandela, që në ndeshjen e parë nuk luajti për probleme me pasaportën. Sulmuesi, bashkë me Zabërgjan, luajnë në këtë edicion europian ndeshjet e fundit me fanellën e Dinamos, duke qenë se klubi ka kompletuar transferimin e tyre. Për Dinamon do të ishte gjithashtu hera e parë që arrin në raundin e tretë të një turneu të UEFA-s dhe me shortin që e katapultoi direct në raundin e dytë, kjo duket hera e duhur.
