Karriera e Luis Suarez tani duket se ka arritur fundin e saj. Kanë kaluar kohët kur Pistolero magjepsi Evropën me golat e tij, një markë e pagabueshme e një historie të jetuar gjithmonë në maksimum. Prej vitesh ai është në podiumin e sulmuesve më të mirë në botë, por koha kalon dhe qëndrimi në fushë bëhet gjithnjë e më i vështirë edhe për të.
Intervista e dhënë për Radio 890 Sport është një goditje në zemër për të gjithë tifozët e tij, që e kanë ndjekur dhe mbështetur në të gjitha aventurat e tij. Në fund të vitit 2023, uruguaiani do të largohet nga Gremio për t’u bashkuar me Inter Miami, së bashku me mikun e tij Leo Messi, duke rindërtuar pjesërisht treshen që – me ndihmën e çmuar të Neymar – bëri që bota të përkulet para Barcelonës.
RRËFIMI TRONDITËS I SUAREZ
Suarez është në pragun e 37-vjetorit, por trupi i tij i ka ndjerë shumë dëmtimet e fundit të pësuar në karrierë. Për të vazhduar përpara, ai merr pilula dhe i nënshtrohet injeksioneve që i lejojnë të luajë të gjitha ndeshjet, por me shumë dhimbje: “Ditë para çdo ndeshje marr tre pilula dhe orë para se të luaj marr një injeksion, përndryshe nuk mund të luaj. Për këtë jam i çalë.”
Sulmuesi vuan pa masë sa herë që del në fushë, edhe pse me gjithë problemet ai sërish arrin të shënojë dhe të bëjë diferencën në Brazil. Në 32 ndeshjet e luajtura në kampionat ai ka shënuar 15 gola dhe 11 asiste, shifra të rëndësishme duke pasur parasysh shqetësimet që pothuajse e pengojnë të luajë.
“E vërteta është se hapat e parë në mëngjes janë shumë të dhimbshëm. Kushdo që më sheh mendon se e kam të pamundur të luaj një ndeshje”, ka rrëfyer Suarez para mikrofonave. Fiziku i tij nuk është më ai i dikurshmi dhe këmbët e tij nuk mund të mbajnë më ritmin e një profesionisti. “Im bir më kërkon të luaj me të, por thjesht nuk mundem”, shtoi Suarez me një tis trishtimi.
