Kryeministri i Kosovës, Albin Kurti ka takuar Sekretaren e Përgjithshme të Forumit Ekonomik të Vjenës, Elena Kirtcheva me të cilën kanë biseduar për bashkëpunimin dhe promovimin e bizneseve nga Kosova. Zyra e Kurtit njofton se në takim është biseduar për hapat e mëtejmë në drejtim të avancimit të rolit të organizatës dhe për të promovuar bizneset nga Kosova si masë drejt zhvillimit ekonomik.
“Gjatë takimit u bisedua rreth mundësisë së avancimit të statusit të organizatës me ndihmën e Republikës së Kosovës si anëtare e VEF si dhe organizimit të forumit të radhës në Vjenë gjatë nëntorit të këtij viti”, thuhet në njoftim.
Në njoftim theksohet se në fokus ishte edhe themelimi i zyrës së VEF në Republikën e Kosovës, e cila do dakordohet përmes një memorandum mirëkuptimi ndërmjet organizatës dhe Zyrës së Kryeministrit.
“Qeveria e Republikës së Kosovës është e përkushtuar ndaj bashkëpunimit të ngushtë me VEF dhe promovimin e bizneseve vendore me qëllim të rritjes ekonomike për dobi të të gjithë qytetarëve të Kosovës”, thuhet në njoftim.
