Delegacioni i Bashkimit Europian konfirmoi ndërprerjen e fondeve në ndihmë të bujqësisë shqiptare për shkak të korrupsionit në ndarjen e tyre, si një masë për të mbrojtur paratë e taksapaguesve europianë. BE ka njoftuar se bllokimi i parave ndodh pas një hetimi të Zyrës Eropiane Kundër Mashtrimit, pas akuzave për korrupsion.
Në përgjigjen e Komisionit Europian për News24 sqarohet se hetimi për korrupsionin në ndarjen e fondeve vazhdon.
“Komisioni Evropian ka informuar qeverinë shqiptare se ka marrë masa paraprake bazuar në informacionin fillestar të dhënë nga Zyra Evropiane Kundër Mashtrimit [OLAF], pas një hetimi mbi akuzat për korrupsion në lidhje me zbatimin e programit IPARD II. Si masë parandaluese për mbrojtjen e interesave financiare të Bashkimit Europian, Komisioni Europian ka ndërprerë përkohësisht rimbursimet ndaj autoriteteve shqiptare për shpenzimet e kryera në kuadër të programit IPARD II.
Komisioni Evropian nuk mund të komentojë mbi asnjë gjetje të mundshme të OLAF-it për zbatimin e programit IPARD II (2014-2020) në Shqipëri. Hetimi i OLAF-it vazhdon. Kur OLAF të dorëzojë raportin përfundimtar, Komisioni Evropian do të informojë autoritetet shqiptare dhe, bazuar në gjetjet e raportit, do të marrë çdo masë të mëtejshme të nevojshme për të mbrojtur interesat financiare të Bashkimit Evropian.”, thuhet në përgjigje.
