Al Hilal, skuadra e drejtuar nga Simone Inzaghi, është kualifikuar për çerekfinalet e Kupës së Botës për Klube. Për ndeshjen kundër brazilianëve të Fluminense, në dispozicion të ish-trajnerit të Inter do të jetë një blerje e re: sulmuesi Abderrazak Hamdallah, që vjen nga Al Shabab. Marrëveshja është praktikisht e përfunduar. Futbollisti ka fluturuar drejt Shteteve të Bashkuara dhe mund të aktivizohet në takimin e ardhshëm. Gjëja befasuese është se Hamdallah do të vijë në huazim dhe do të qëndrojë në skuadër vetëm për Kupën e Botës për Klube, një blerje me afat.
Abderrazak Hamdallah është blerja e re e Al Hilal, që në javët para Kupës së Botës për Klube dhe në dritaren e parë të merkatos së vlefshme, atë para të tetëve të finales, kishte provuar të blinte Theo Hernandez, i cili gjithsesi është shumë pranë, dhe Victor Osimhen, i cili ka hequr dorë nga oferta të jashtëzakonshme. Më e thjeshtë ishte marrëveshja për Hamdallah, sulmuesin maroken të lindur në vitin 1990, i cili me kombëtaren e tij ka luajtur në Botërorin 2022 dhe që vjen në huazim për të luajtur fazën finale të kësaj gare.
Hamdallah ka shënuar në Saudi League vetëm 4 gola më pak se Ronaldo
Bomberi maroken është një garanci absolute dhe për këtë është marrë nga skuadra e teknikut Inzaghi, e cila ka nevojë për një përforcim në sulm. Hamdallah me Al Shabab, të drejtuar nga Terim, sezonin e kaluar ka shënuar 21 gola në Saudi Pro League, po aq sa Benzema. Më mirë se ata vetëm Cristiano Ronaldo (25) dhe anglezi Ivan Toney (23). Hamdallah ka shënuar më shumë gola se Mitrovic, Aubameyang dhe Mané.
Sulmuesi u bë i famshëm sepse u godit me kamxhik
Hamdallah është shumë më i njohur se sa mund të mendohet. Sepse ky sulmues përfundoi në faqet e kronikave, pak më shumë se një vit më parë, kur ishte ende lojtar i Al Ittihad. Futbollisti u godit me kamxhik në përfundim të finales së Superkupës të humbur pikërisht kundër Al Hilal. Hamdallah iu përgjigj disa fyerjeve të marra nga tribuna dhe u godit me kamxhik nga një spektator.
