Në ditën e katërt të fazës së Champions League, Napoli nuk arrin të shkojë përtej barazimit 0-0 kundër Eintracht Frankfurt. Në një ndeshje të ekuilibruar, në pjesën e parë, pas rrezikut nga kundërsulmi i Bahoya që nuk u shfrytëzua pas rikuperimit ndaj Politano, napolitanët u rritën minutë pas minute duke u bërë disa herë të rrezikshëm. Hojlund dhe Elmas ishin më të frymëzuarit, me danezin që iu afrua golit në dy raste, në minutat e 6’ dhe 21’, i ndalur nga ish-lojtari i Bolonjës, Theate, dhe nga portieri Zetterer, ndërsa maqedonasi ishte një ferr në anën e mbrojtjes gjermane. Edhe Anguissa e provoi dhe, mes rikuperimeve dhe daljeve ofensive, i përveshi mëngët për t’i dhënë një tronditje skuadrës së tij.
Në pjesën e dytë, napolitanët nisin fort, por nuk arrijnë të çajnë mbrojtjen, madje rrezikojnë në dy raste pas goditjeve të Gotze dhe Kristensen. Në minutën e 68’, McTominay ndalet nga Koch pas një krosimi të shkëlqyer të Elmas, ndërsa pak minuta më vonë është Milinkovic-Savic ai që i mbyll portën Knauff, duke shpëtuar Napolin. Conte përpiqet të ndryshojë diçka duke futur në lojë Neres dhe Lang, por fotografia e ndeshjes mbetet gabimi i McTominay në minutën e 83’, me skocezin që humb mundësinë e artë për 1-0, duke goditur një penallti në lëvizje shumë lart mbi traversë. Në fund, Zetterer shpëton dy herë ndaj Elmas dhe Hojlund, për një barazim që nuk i shërben shumë Napolit në renditje, me skuadrën e Contes që mbetet me të njëjtin numër pikësh me gjermanët në zonën e “playoff”.
SLAVIA PRAGUE 0-3 ARSENAL
Në Pragë praktikisht nuk pati ndeshje, kur Slavia e Arsenal u vunë përballë. Londinezët, në një formë brilante edhe në kampionat, zhbllokuan ndeshjen me një penallti në minutën e 32’. Saka u tregua i saktë nga pika e bardhë, duke e bërë më të thjeshtë ndeshjen për sku7adrën e teknikut Arteta. Çekët u munduan të ekuilibronin lojën, por u goditën sapo nisi pjesa e dytë nga Merino. Spanjolli shënoi edhe golin e tretë në minutën e 68’, duke iu gëzuar dygolëshit personal. Arsenal kryeson renditjen në Champions me pikë të plota pas katër ndeshjeve, ndërsa Slavia është në vendin e 30 me vetëm dy pikë.
