Pas gati gjashtë vitesh, Brad Pitt thuhet se po përballet me mundësinë e hidhur që të mos ketë një marrëdhënie të ngushtë me gjashtë fëmijët e tij me Angelina Jolie.
Pitt, 58 vjeç, ka qenë “duke u ankuar tek miqtë” se ish-gruaja e tij, Jolie, 46 vjeç, nuk do të pranojë kurrë kujdesin e përbashkët dhe praktikisht dëshiron “të kalojë kohë me ta deri sa fëmijët të bëhen 18 vjeç,” ka thënë një burim për revistën Us Weekly.
Për më tepër, aktori i “Once Upon a Time in Hollywood” është nën përshtypjen se Jolie shpreson që fëmijët “nuk do të duan të kenë kontakt me të” sapo të arrijnë moshën e pjekurisë, sipas këtij burimi.
Në fakt, dy nga fëmijët — djemtë Maddox, 20 vjeç, dhe Pax, 18 vjeç — tashmë janë të rritur. Për ta, beteja për kujdestarinë është bërë e panevojshme. Vajza Zahara, 17 vjeç, nuk është shumë pas.
Kjo lë vajzën Shiloh, 15 vjeç, dhe binjakët Vivienne dhe Knox, 13 vjeç, që do të jenë fokus i përplasjes ligjore mes prindërve të tyre.
Avokatët e njohur të divorcesh kanë thënë më parë se është e dyshimtë të vazhdohet një betejë për kujdestarinë kur fëmijët bëhen adoleshentë.
Kjo për shkak se është e vështirë për një gjykatë të zbatojë çështjet e zakonshme të kujdesit për vendin ku do të jetojnë fëmijët dhe sa kohë do të kalojnë me secilin prind, pasi fëmijët kanë moshën për të marrë këto vendime vetë.
“Kur fëmijët kalojnë në vitet e adoleshencës, ka shumë pak që një gjykatë mund të bëjë për t’i detyruar ata të kalojnë kohë me një prind të caktuar,” ka thënë Daniel Nottes, një avokat i familjes me seli në New York, për këtë organizatë lajmesh në vitin 2021.
Beteja ligjore mes çiftit të njohur të Hollivudit ka filluar në shtator 2016, kur Jolie kërkoi divorcin dhe akuzoi menjëherë Pitt për dhunë në familje.
Aktori më vonë e pranoi në intervista se kishte kërkuar ndihmë për të trajtuar problemet me pirjen e alkoolit dhe menaxhimin e zemërimit të tij.
Ai e mohoi që të kishte ushtruar dhunë fizike ndaj fëmijëve të tij, ndërkohë që FBI dhe autoritetet e mirëqenies së fëmijëve e shpallën të pafajshëm për incidentin me Maddox.
Po ashtu, u raportua në vitin 2018 dhe 2019 që aktori ishte i lumtur të kishte takime me fëmijët e tij nën mbikëqyrjen e një punonjësi të caktuar nga gjykata.
Ekspertët e ligjit të familjes thanë se miratimi i Pitt për vizita të mbikëqyrura tregonte se ai po bënte përpjekje për të qenë një baba i mirë dhe për të praktikuar “prindërim të duhur.”
