Presidenti Joe Biden ka mohuar thashethemet që qarkullojnë ditët e fundit për një tërheqje të mundshme. Në një deklaratë, Biden ka thënë se mezi pret të kthehet në fushatë javën e ardhshme. Ai u la të reflektonte alternativat gjatë fundjavës, pas valës së kriticizmit dhe mungesës së besimit që është përhapur brenda partisë së tij. Ekipi i presidentit këmbëngul se ai është gati të rikthehet për t’iu kundërvënë “vizionit të zymtë” të ish-presidentit Trump.
Zgjedhja që për të duket e qartë, nuk gëzon simpati mes demokratëve. 36 anëtarë të Kongresit mendojnë se Biden duhet të tërhiqet. I fundit ndër ta, ligjvënësi Mark Takano, i bëri thirrje presidentit Bidenit që t’ia kalojë stafetën nënpresidentes Kamala Harris. Ndërkohë, Senatorja nga Masaçusetsi, Elizabeth Warren tha se nënpresidentja është “e aftë të marrë përsipër” bashkimin e partisë dhe përballjen me ish-presidentin Trump.
Këto zhvillime në kampin demokrat janë në kontrast të qartë me republikanët. Këta të fundit, pas vitesh mosmarrëveshjesh të ashpra dhe kaotike të brendshme rreth zotit Trump, kanë përqafuar në thelb mbizotërimin e tij.
