Aktorja Blake Lively ka paditur regjisorin e filmit It Ends With Us, Justin Baldoni, dhe disa persona të tjerë të lidhur me filmin, duke pretenduar ngacmim dhe një fushatë të koordinuar për të dëmtuar reputacionin e saj pasi ajo denoncoi trajtimin e saj gjatë xhirimeve, transmeton Gazeta Metro.
Padia federale u dorëzua në Nju Jork të martën, disa orë pasi Baldoni dhe shumë nga të paditurit e tjerë në çështjen e Lively paditën gazetën New York Times për shpifje lidhur me një artikull mbi pretendimet e saj, duke thënë se gazeta dhe aktorja po organizonin një fushatë të koordinuar për të njollosur reputacionin e tyre.
Në padi, Lively pretendon se Baldoni, kompania prodhuese e filmit Wayfarer Studios dhe të tjerë kanë kryer “një plan të kujdesshëm, të koordinuar dhe të financuar për të heshtur atë dhe të tjerë që denoncojnë”. Ajo akuzon Baldoni dhe studion për ndërmarrjen e një “plani me shumë nivele” për të dëmtuar reputacionin e saj pas një takimi ku ajo dhe bashkëshorti i saj, aktori Ryan Reynolds, adresuan “ngacmime seksuale të përsëritura dhe sjellje të tjera shqetësuese” nga Baldoni dhe producenti Jamey Heath, i cili gjithashtu përmendet në të dyja paditë.
Sipas padisë, trajtimi i pretenduar përfshinte komente nga Baldoni për trupin e Lively dhe të grave të tjera në set. Gjithashtu, Baldoni dhe Heath pretendohet se “diskutonin përvojat e tyre personale seksuale dhe varësinë e mëparshme nga pornografia, duke u përpjekur ta detyronin zonjën Lively të zbulonte detaje për jetën e saj intime”.
Në të njëjtën ditë, Baldoni dhe të tjerët ngritën padinë për shpifje kundër New York Times në gjykatën superiore të Los Anxhelosit, duke kërkuar të paktën 250 milionë dollarë dëmshpërblim. Gazeta deklaroi se qëndron pas raportimit të saj dhe planifikon të mbrohet fuqishëm kundër padisë.
Ndër të paditurit në padinë e Lively dhe paditësit në çështjen e shpifjes përfshihen Wayfarer Studios dhe ekspertja e komunikimeve të krizës Melissa Nathan, mesazhi i supozuar i së cilës ishte cituar në titullin e artikullit të datës 21 dhjetor: “‘Ne Mund të Varrosim Këdo’: Brenda një Makinerie të Përbaltjes në Hollywood.”
