Ndeshja mes Benfikës dhe Barcelonës në javën e 7-të të Champions League tashmë ka hyrë në histori. Katalanasit fituan me rezultatin spektakolar 5-4, duke siguruar tri pikë falë një përmbysjeje të jashtëzakonshme, pasi ishin në disavantazh 4-2 vetëm 12 minuta para fundit. Një fitore e rëndësishme për Barcelonën, por një humbje e hidhur për portugezët. Pas përfundimit të ndeshjes ndodhën skena të tensionuara. Raphinha u përplas me disa lojtarë të Benfikës, ndërsa trajneri i tyre, Bruno Lage, u tregua i ashpër ndaj arbitrit për disa vendime të dyshimta.
Fitorja i siguroi Barcelonës një vend në fazën e 1/8-ve dhe një hap të madh drejt vendit të dytë në grup. Një humbje do të kishte qenë fatale, por katalanasit përmbysën gjithçka, duke marrë jo vetëm tri pikët, por edhe një motivim të madh. Szczesny bëri një gabim në pjesën e parë, skuadra u trondit dhe përfundoi në disavantazh 3-1, më pas 4-2. Lewandowski shënoi me penallti në minutën e 78-të, Garcia barazoi në të 86-ën, dhe në minutën e 96-të Raphinha vulosi fitoren.
Raphinha shënon dhe ofendohet nga lojtarët e Benfikës
Këto janë faktet e ndeshjes, por pas përfundimit të saj nuk munguan polemikat, madje edhe nga radhët e Barcelonës. Raphinha, i rritur në Lisbonë por si pjesë e Sportingut, pati një përplasje të ashpër me disa lojtarë të Benfikës. Pas shënimit të golit vendimtar, ai festoi, por kjo festë irritoi disa kundërshtarë që e rrethuan pas fishkëllimës përfundimtare. Situata u tensionua aq shumë saqë forcat e sigurisë u detyruan të ndërhyjnë.
Raphinha, pas ndeshjes, shpjegoi për Movistar+: “Respektoj të gjithë. Kur dola nga fusha, kishte njerëz që më fyenin dhe unë iu përgjigja, e di që nuk duhej ta bëja. Të gjithë nxehemi. Nëse më respektojnë, unë i respektoj.”
Trajneri i Benfikës i tërbuar për vendimin e arbitrit Makkelie
Humbja e ka prekur thellë Benfikën. Gazeta portugeze A Bola shkruan se presidenti i klubit, ish-mesfushori i famshëm Rui Costa, zbriti në dhomat e zhveshjes për të kërkuar sqarime në lidhje me aksionin që solli golin e pestë të Barcelonës. Sipas tij, në fillim të aksionit duhej të ishte akorduar një penallti për Benfikën, e cila mund të kishte ndryshuar rrjedhën e ndeshjes. Trajneri Bruno Lage deklaroi: “Duhet të analizoj ndeshjen dhe të shoh se çfarë ndodhi në minutën e 94-të, por besoj se ishte një gabim i tmerrshëm nga arbitri.”
Arbitri holandez Makkelie nuk ishte në nivelin e duhur sipas Lage. Sidomos vendimi i tij i fundit, që solli golin e Barcelonës, shkaktoi shumë polemika. Lage tha: “Nuk flas as për veten time e as për tifozët, por të gjithë ekspertët e kanë parë qartë se duhej dhënë penalltia. Arbitri duhet të përdorë të njëjtin kriter siç e bëri për penalltitë e Barcelonës. Ky është një gabim i rëndë.”
Mesfushori i Benfikës, Florentino, edhe pse pranoi gabimet e skuadrës së tij, foli për ndikimin e arbitrit: “Është e qartë që arbitri pati një ndikim të vogël në ndeshje, por ka disa aspekte ku duhet të rritemi dhe të punojmë për të qenë më të fortë në ndeshjen e ardhshme”.
