Parlamenti Evropian dhe Këshilli i BE-së arritën sonte në mbrëmje një marrëveshje politike mbi rregulloren e re të kthimit për migrantët që nuk kanë të drejtë të qëndrojnë ligjërisht në BE. Kjo marrëveshje ka hapur rrugën për krijimin e qendrave të kthimit në vendet jashtë BE-së, si ai i Gjadrit.
Sipas Presidencës Qipriote të Këshillit të BE-së, marrëveshja synon të përshpejtojë procedurat e kthimit dhe të rrisë efektivitetin e sistemit evropian të kthimeve.
“Marrëveshja e sotme forcon besueshmërinë e politikës së migracionit të BE-së dhe plotëson Paktin për Migracionin dhe Azilin, duke respektuar të drejtat e njeriut”, – tha Nikolaos Ioannidis, zv.Ministër për Migracionin dhe Mbrojtjen Ndërkombëtare të Republikës së Qipros.
Rregullorja e re parashikon detyrime më të rrepta për personat që i nënshtrohen një vendimi kthimi, duke përfshirë detyrimin për të bashkëpunuar me autoritetet kombëtare kompetente dhe për t’u përmbajtur procedurave për largimin nga Shteti Anëtar në të cilin ata janë të pranishëm.
Në të njëjtën kohë, krijohet një kuadër ligjor që u lejon Shteteve Anëtare të krijojnë qendra kthimi në vendet e treta. Këto objekte mund të funksionojnë ose si destinacione përfundimtare ose si qendra të ndërmjetme tranziti, duke lehtësuar kthimet në vendet e origjinës ose në vende të tjera të treta, me dispozita për mbrojtjen e të drejtave themelore.
Marrëveshja aktualisht ruan njohjen reciproke të vendimeve të kthimit midis Shteteve Anëtare në një bazë opsionale, me një dispozitë për një shqyrtim të çështjes pas hyrjes në fuqi të kuadrit të ri. Ajo gjithashtu prezanton Urdhrin Evropian të Kthimit (ERO), një dokument i vetëm që regjistron elementët kryesorë të secilit vendim kthimi.
Qëllimi është të lehtësohet shkëmbimi i informacionit dhe të përshpejtohet njohja dhe ekzekutimi i vendimeve të lëshuara nga Shtetet e tjera Anëtare. Rregullorja gjithashtu përfshin dispozita specifike për rastet e personave që konsiderohen se paraqesin rrezik për politikën publike ose sigurinë.
Marrëveshja politike tani do të duhet të miratohet zyrtarisht nga Parlamenti Evropian dhe Këshilli përpara se rregullorja të hyjë në fuqi. Rregullat e reja janë pjesë e Paktit të BE-së për Migracionin dhe Azilin, i cili zbatohet nga 12 qershori 2026.
