Ndeshja e fituar thellë nga Barcelona kundër Valencias pati një epilog të papritur për vendasit. Këta të fundit, në fakt, u detyruan të linin stadiumin pa u larë dot, duke iu drejtuar kështu zgjidhjeve të emergjencës. Në tunelin e vogël të stadiumit Johan Cruyff u panë skena të veçanta, me shumë futbollistë blaugrana që u shfaqën në të njëjtat kushte në të cilat kishin dalë nga fusha.
Epilogu kurioz i ndeshjes mes Barcelonës dhe Valencias, çfarë ndodhi
Një ditë e veçantë, pra, për Barçën, e cila nuk nisi nën shenjat më të mira. Dëmtimi i Yamal dhe mungesa në formacionin titullar e Raphinha-s për shkak të një vonese në seancën e aktivizimit para ndeshjes dukeshin si hyrja në një ndeshje të vështirë për djemtë e Flick, të cilët në vend të kësaj dominuan plotësisht kundërshtarët 6-0. Buzëqeshje dhe entuziazëm në qiell në përfundim të lojës, por menjëherë pas kësaj erdhi surpriza e keqe me pamundësinë për të bërë dush.
Futbollistët e Barcelonës nuk mund të bëjnë dush
Një situatë që erdhi si pasojë e problemeve të impiantit Johan Cruyff, me vetëm 6 mijë vende. Barcelona u detyrua të luante aty për shkak të punimeve në Camp Nou, tashmë në fazën përfundimtare, dhe për pamundësinë e përdorimit të Stadiumit Olimpik të Montjuïc, i zënë nga një koncert. Kështu erdhi leja e posaçme për të luajtur në këtë impiant të vogël, me jo pak probleme. Në fakt, Estadi Johan Cruyff nuk ishte gati për të pritur të dyja skuadrat dhe për të garantuar shërbimet e zakonshme për një ndeshje futbolli.
Skena kurioze në tunelin që të çon nga dhomat e zhveshjes, me pothuajse të gjithë lojtarët ende të veshur me uniformat e përdorura në fushë. Disa mbanin në duar këpucët me thumba dhe në këmbë shapkat. Të tjerë, si Araujo, ishin pa fanellë dhe me peshqirë që mbulonin shpatullat dhe bustin. Skena futbolli amator, me një siklet të dukshëm edhe nga vetë të përfshirët. Nëse disa prej tyre u drejtuan më pas në pika të tjera të strukturave të klubit për t’u larë, të tjerë u kthyen në shtëpi me makinë saktësisht ashtu si kishin mbaruar ndeshjen. Me pak fjalë, një fundjavë që u mbyll qartazi jashtë kornizave për skuadrën katalanase.
